Description
-
Martin IV (1281-1285)
-
{517}Executioni testamenti Decani Ecclesiæ Turonen. substituit aliorum loco. (Ex Reges. Vatic. Pontif. epist. 125. tom. 1. ann. 3.)
-
Anno 1284. die 15. Martii.
-
1284
-
MARTINUS &c.
Dilectis Filiis Johanni Subdiacono Ecclesiæ Sancti Martini Turonen.a & Magistro Guillelmo de Esseyo Cappellano Nostro Canonico Carnoten.b Salutem, & Apostolicam Benedictionem.
Olim, sicut accepimus, quondam Magister Egidius de Bonavallec Decanus Ecclesiæ Turonen. testamentum condens in suâ ultimâ voluntate, in quo inter alia quædam de bonis suis in pios usus erogari mandavit, Venerabilem Fratrem Nostrum Gualteriumd Episcopum Pictaven.e Ordinis Minorum tunc Ministrum, & Fratrem dicti Ordinis in Regno Franciæ, ac te, Fili Magister Guillelme, & quondam Magistrum Fulconem Archidiaconum in Pontivo in Ecclesiâ Ambianen.f executores ejusdem constituit testamenti. Verùm prædicto Fulcone viam universæ carnis ingresso, dictoque Episcopo post curam susceptam Pontificalis Officii, executionem dicti testamenti gerere recusante, nondum præfati Testatoris intentio extitit adimpleta. Nos igitur volentes super hoc de opportuno remedio providere, te, Fili Subdiacone, in executione dicti testamenti loco dictorum Episcopi, & Archidiaconi duximus subrogandum, Discretioni vestræ per Apostolica scripta mandantes, quatenus ad executionem hujusmodi faciendam juxta dispositionem prælibati Testatoris absque moræ dispendio efficaciter procedatis.
Datum apud Urbemveterem Idibus Martii, Pontificatus Nostri Anno Tertio.
-
Bullarium Franciscanum romanorum pontificum, tomus III, n°LXI., pp.-518
-
(a) Turonen.: Vulgo Tours in Gallia Celtica ad fluvium Ligerim Archiepisc.
-
(b) Carnoten.: Al. Carnaten. vulgo Ciartres in eadem Gallia Episc. tunc sub Archiepiscopo Senonen., nunc Parisiensi subjectus in Belsia Provincia.
-
(c) Bonavalle: Oppidulo Galliæ in agro Carnutensi ad Lædum fluvium.
-
(d) Gualterium: Patria Brugensem in Flandria, & Doctorem Parisien., de quo Waddingus in Annal., & in lib. de Scriptor. Ord. Min.
-
(e) Pictaven.: In Gallia anno 1279. promotum, ut ibi vidimus ex epist. 138. Nicolai III.
-
(f) Ambianen.: Vulgo Amiens in Picardia veteris Belgii regione.