« bullarium-franciscanum-2285 »

MARTINUS &c.

Venerabili Fratri …a Episcopo Sabinen. Apost. Sedis Legato Sal., & Ap. Ben.

Dudum Ecclesiâ Sancti Marcib per obitum bonæ memoriæ F.c ipsius Episcopi Pastoris solatio destitutâ, Capitulum ejusdem Ecclesiæ dilectum Filium Transmundumd de Guillivisio Clericum in Episcopum Sancti Marci per viam scrutinii assumpserunt; & tandem eodem Transmundo electioni recusante hujusmodi consentire, iidem Capitulum vocatis omnibus, qui voluerunt, debuerunt, & potuerunt commodè interesse pro futuri substitutione Pastoris, prout moris est, convenientes in unum; Et tandem per eamdem viam procedere ad electionem hujusmodi eligentes, G. Archidiaconum, & Bartholomæum Cantorem ipsius Ecclesiæ suorum votorum scrutatores concorditer elegerunt, qui sua, & singulorum de dicto Capitulo vota diligentiùs perscrutati mox illa dictis Capitulo publicarunt; & comperto denique, quòd hujusmodi vota convenerant in dilectum Filium Marcum Canonicum Ecclesiæ sæpefactæ; dictus Archidiaconus suo, dictorumque Capituli, & Collegæ sui nomine præfatum Marcum elegit in Episcopum Sancti Marci. Cumque fel. record. Nicolaus Papa prædecessor Noster per Venerabilem Fratrem …e Episcopum Albanensem, & dilectos filios Nostros A.f tituli S. Praxedis Presbyterum, & J.g S. Mariæ in Cosmedin Diaconum Cardinales præsentatam sibi electionem hujusmodi de dicto Marco celebratam diligenter examinari fecisset; Nos postmodum, licet immeriti ad apicem Apostolatus assumpti Venerabili Fratri Nostro …h Episcopo Neocastren., & dilecto Filio … Custodi Ordinis Fratrum Minorum de Cusentia Nostris sub certâ formâ dedimus litterisi in mandatis, ut super hujusmodi articulis, videlicet, quòd pro eo quòd licèt constaret de tempore, quo hujusmodi electio facta fuit, dies tamen obitus dicti Episcopi per ea, quæ coram eisdem Examinatoribus fuerant exhibita, non apparebat; dubitabatur, nec immeritò, an eadem electio infra trimestre tempus celebrata fuisset; & quòd quidam Electi consanguineus pro eodem Electo in eâdem Ecclesia in Episcopum promovendo quibusdam ex ipso Capitulo dicti Electi nomine promisit dare ad opus ipsius Ecclesiæ quamdam pecuniæ quantitatem; ac quòd dictus Electus tempore, quo Electus extitit, patiebatur in ætate defectum; nec non super eo quod in instanti vacatione ipsius Ecclesiæ Sancti Marci alia dicebatur ante istam, de qua agitur, electio celebrata; juxta interrogatoria, quæ iidem Cardinales sub suis sigillis mitterent interclusa, inquirerent diligentiùs veritatem. Verùm licet, sicut ex fidedigna dictorum Cardinalium relatione accepimus, electio hujusmodi inventa sit canonicè celebrata; nihilque compertum in inquisitione super dictis articulis factâ existat, quòd dicto Electo super hoc, & hujusmodi electioni obsistat: Nos tamen considerantes, quòd persona, & Ecclesia, de quibus agitur, tuæ Legationisj existunt; & per te potest hujusmodi negotium commodiùs & celeriùs expediri; Fraternitati Tuæ per Apostolica scripta mandamus, quatenus personam ipsius Electi examines diligenter; & si eam tandem inveneris ydoneam ad supportationem tanti oneris, & honoris electionem hujusmodi de ipso factam, studeas confirmare; dictumque Electum postea in Diaconatus ordine, ut asserit, constitutum, in Sacerdotem statuto tempore promoveas; vel per alium Episcopum facias promoveri; & sibi demum convocato ad hoc congruo Episcoporum numero impendere munus consecrationis procures; & facias sibi a suis subditis obedientiam, & reverentiam debitam exhiberi; recepturus ab eo postmodum Nostro, & Ecclesiæ Romanæ nomine sub formâ, quam tibi sub Bulla Nostrâ interclusam transmittimus, solitum juramentumk. Alioquin hujusmodi electione ritè cassatâ, facias eidem Ecclesiæ de Pastore ydoneo per electionem canonicam provideri.

Datum apud Urbemveterem xii. Kalendas Februarii, Pontificatus Nostri Anno Secundo.