Description
-
Alexandre IV (1254-1261)
-
Ut pecuniam nomine pœnæ in compositione non servata impositam a Monasterio S. Pauli de Valle Pontis solvi procuret, aut compellat; vel ad comparendum citet. (Ex Autographo in Archivo Perusino nostri Conventus S. Francisci.)
-
Anno 1258. die 31. Julii.
-
1258
-
ALEXANDER &c.
Dilecto filio ‥ Priori Sancti Antonii Perusin. Salutem, & Apostolicam Benedictionem.
Ex parte dilectarum filiarum in Christo ‥ Abbatissæ, & Conventus Monasterii Sanctæ Mariæ de Monte Lucidoa Perusin. Ordinis Sancti Damiani Nobis est oblata querela, quod Abbas, & Conventus Monasterii Sancti Pauli de Valle Pontisb Perusinæ Diœcesis compositionem, quæ inter ipsas ex parte una, & eumdem Abbatem suo, & Conventus sui Monasterii nomine ex altera super quodam Molendinoc, clausura, pertinentiis, & circumstantiis suis quibusdam mediantibus amicabiliter intervenisse dignoscitur, motu proprio renuentes penitus observare, de quadam pecuniæ summa, quæ nomine pœnæ in compositionem devenit eamdem, & in qua de jure tenentur eisdem; prout in Instrumento publico inde confecto plenius dicitur contineri; satisfacere ipsis denegant in ipsarum, & Monasterii earum præjudicium, & gravamen; Quare suppliciter petebant a Nobis, ut Apostolica super hoc eis providere sollicitudine curaremus. Quocirca discretioni tuæ per Apostolica scripta mandamus, quatenus memoratos Abbatem, & Conventum, ut & compositionem servent eamdem; & præfatis Abbatissæ, & Conventui de prædicta pecunia nomine pœnæ prædictæ debita ipsis satisfaciant, ut tenentur; monere procures, & inducere diligenter; & eos ad id, si necesse fuerit, per censuram Ecclesiasticam appellatione remota compellas. Quod si forte iidem Abbas, & Conventus sic etiam induci non poterunt ad præmissa; ex parte nostra peremptorie cites eosdem, ut infra octo dies post citationem tuam Abbas personaliter, & Conventus prædicti per Procuratorem idoneum Apostolico se conspectui repræsentent, quare mandatum nostrum super iis non impleverint, legitime ostensuri. Diem vero citationis, & quidquid inde feceris, Nobis per tuas litteras fideliter intimare procures.
Datum Viterbii ii. Kalendas Augusti, Pontificatus Nostri Anno Quarto.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CDXXXIV., p.297
-
(a) S. Mariæ de monte Lucido: de quo Monasterio actum est quam sæpe in præcedenti hujus Operis tomo, & non semel in isto.
-
(b) S. Pauli de Valle Pontis: Cujus mentio extat & in Bulla 273. superius allata præcedenti anno.
-
(c) Super quodam Molendino: De quo permutationis causa cum Ecclesia S. Mariæ de Presso agit Pontifex in litteris Sicut accepimus &c. anno præcedenti die 9. Januarii eidem Priori S. Antonii datis, cui etiam direxit litteras proxime sequentes. At forsan contractus ille minime effectum sortitus est, nam in privilegio Clementis IV. anno 1266. die 23. Martii Monialium Monasterio dato, & infra referendo inter illius bona recensetur & Ecclesia S. Mariæ de Presso; hæc autem Ecclesia legitur in Bulla, ac privilegio Nicolai IV. Religiosam vitam &c. Monasterio S. Laurentii de Collazone collato anno 1291. die 23. Julii; quo cum venditio forsan, vel potius commutatio intercessit.