Description
-
Alexandre IV (1254-1261)
-
Ut Capellanum Pontificium servet indemnem; & Monasterium S. Pauli de Valle Pontis Perusin. ad compositionem cum Monasterio Montis Lucidi tenendam, pecuniamque nomine pænæ solvendam inducat, atque compellat. (Ex eodem Archivo Perusino.)
-
Anno 1258. die 31. Julii.
-
1258
-
ALEXANDER &c.
Eidem.
Dilectus filius Magister Raynerius de Viterbioa Capellanus noster sua Nobis petitione monstravit, quod cum ipse pro Abbate, & Conventu Monasterii Sancti Pauli de Valle Pontis Perusinæ Diœcesis ad supplicem ipsius Abbatis instantiam penes dilectas filias in Christo Abbatissam, & Conventum Monasterii Sanctæ Mariæ de Monte Lucido Perusin. Ordinis Sancti Damiani, vel Procuratorem ipsarum in quadam fide asserat pecuniæ summam principalem se super solutione ipsius eisdem constituisse debitorem; ad cujus solutionem idem Abbas nomine pœnæ præfatis Abbatissæ, & Conventui se adstrinxisse dicitur; si una cum eodem Conventu suo compositionem, quæ inter jam dictas Abbatissam, & Conventum ex parte una, & eumdem Abbatem suo, & Conventus, & Monasterii sui nomine ex altera super quodam Molendino, clausura, pertinentiis, & circumstantiis suis quibusdam mediantibus amicabiliter intervenisse dignoscitur, non servaret; prout in Instrumento publico inde confecto plenius dicitur continerib; Præfatus Abbas contra compositionem jam dictam temere veniens dictum Capellanum super hujusmodi solutione pecuniæ servare non curet indemnem motu propriæ voluntatis. Nolentes igitur, quod præfatus Capellanus inde gravamen incurrat, unde gratiam promeretur; discretioni tuæ per Apostolica scripta mandamus, quatenus memoratos Abbatem, & Conventum, ut & compositionem servent eamdem; & præfatis Abbatissæ, & Conventui de prædicta pecunia nomine prædictæ pœnæ debita ipsi satisfaciant, ut tenentur, monere procures, & inducere diligenter; eosque ad id, si necesse fuerit, per censuram Ecclesiasticam, appellatione remota, compellas. Quod si forte idem Abbas, & Conventus sic etiam induci non poterunt ad præmissa; ex parte nostra peremptorie cites eosdem, ut infra octo dies post citationem tuam Abbas personaliter, & Conventus prædicti per Procuratorem idoneum Apostolico se conspectui repræsentent, quare mandatum nostrum super iis non impleverint, legitime ostensuri. Diem vero citationis, & quidquid super iis feceris, Nobis tuis litteris fideliter intimare procures.
Datum, ut supra.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CDXXXV., p.298
-
(a) Raynerius de Viterbio: Qui postea factus est Rector Patrimonii B. Petri in Tuscia ex litteris Ad expurgandum &c. anno 1261. die 12. Januarii ad eum datis, & Dum ad studium &c. anno 1260. die 30. Martii populo Tuscanensi scriptis.
-
(b) Dicitur contineri: De qua re dedit Priori S. Antonii præcedentes litteras hoc ipso die, & de qua jam superiori anno agebatur ex litteris Sicut accepimus &c. præfato Priori die 9. Januarii datis, jamque a quibusdam malevolis impediebatur tractatus.