Description
-
Alexandre IV (1254-1261)
-
In pœnam, & odium Ezelini, ejusque fratris Alberici hostium Ecclesiæ libera sanxit esse eorum mancipia, & mancipiorum filios, & nepotes ad Ecclesiam reversos, reversurosque. (Ex Vatic. Tabulario in Reges. Pontif. epist. 170. an. 4., Raynaldo in Annal. Eccles. ad hunc ann. num. 2. sine exordio, & Ughello to. 5. Ital. sac. in Episc. Tarvis. 2. edit.)
-
Anno 1258. die 3. Julii.
-
1258
-
ALEXANDER &c.
Quia homines natura pares peccati servitus fecit esse subjectos; justum profecto videtur, ut qui ab eo, a quo est omnis potestas in Cælo, & in terra, concesso sibi dominio abutuntur, ingratitudinis merito in servos sibi commissa potestate priventur; & qui Deo potius, quam hominibus obedientes Dominorum nequitiam zelo Fidei contra Christum sequi contemnunt, ut vere sint liberi, ab omni servitute humana pro præmio eximantur; quatenus hoc exemplo persecutores Ecclesiæ, & Catholicæ fidei condignæ punctionis aculeo urgeantur; ut, si possibile sit, a sua perversitate resiliant; & se convertant ad studium devotionis debitæ, ac viam veritatis agnoscant; sitque Fidelibus in gaudium intendere virtutum cultui; dum sibi provenientibus gratiarum præmiis perspiciunt reprobos pro iniquitate sua deprimi; & bonorum penitus ubertate privari. Sane Eczelinus de Romano tamquam hæreticus dudum ab Ecclesiastica unitate præcisus extititc; & Albericus germanus ejus per Nos tamquam fautor, & defensor hæreticorum est vinculo excommunicationis astrictusd, ac privatus omnibus indulgentiis, & privilegiis sibi ab Apostolica Sede concessise. Sed ipsi cordibus suis induratis, velut malleatoris incus, quasi mare fervent; & Ecclesiam, ac devotos ipsius tamquam hostes, & persecutores Catholicæ Fidei, spiritu ad superbiam obfirmato, non desinunt impugnaref. Quia vero dignum est, ut Eczelinus, & Albericus prædicti de iniquitate sua doleant se jacturam aliquam reportasse; omnes Servos, & Ancillasg ipsorum cum ejusdem conditionis filiis, & nepotibus, qui redierunt, vel redibunt ad Ecclesiæ unitatem; & in ejusdem obedientia, & devotione permanserint cum suo peculio, de Fratrum nostrorum consilio auctoritate Apostolica tradimus plenariæ libertati, & eos liberos esse decernimus: Ita quod ipsi peculia sua libere valeant retinere; & ea libertate gaudere, qua gauderent, si liberi nati essent. Quocirca Fraternitati vestræ mandamus, quatenus hujusmodi libertos manutenere, ac in libertate defendere procuretis: contradictores per censuram Ecclesiasticam appellatione postposita compescendo: invocato ad hoc, si opus fuerit, auxilio brachii Sæcularis.
Datum Viterbii v. Nonas Julii, Pontificatus Nostri Anno Quarto.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CDXXXII., pp.295-296
-
(a) Ven. Fratribus ...: Bartholomæo Vicentino Ord. Prædicat. ex Episcopo Nimocien. in Regno Cypri anno 1256. mense Januario ad patriæ suæ Cathedram translato, de quo sui Ordinis Scriptores agunt, Ughellus to. 5. Ital. Sac., aliique plures.
-
(b) Et ...: Alberto Ricco Patritio Vicentino Ord. Minor. an. 1255. mense Aug. ad Tarvisinam Ecclesiam tunc sub Patriarcha Aquilejen. promoto ex cit. Ughello, & Waddingo in Annal. Min., atque ex 100. Bulla hujus Pontificis supra relata.
-
(c) Præcisus extitit: Ab Innocentio IV. anno 1248., ut apud Raynaldum ad eum ann. n. 25. & 26.
-
(d) Vinculo excommunicationis astrictus: Hujus censuræ sententia abest ab Annalibus Eccles., lata tamen fuit præcendenti anno, quo Albericus ab Ecclesia ad Ezelinum fratrem transfugit, ut in cit. Annal. ad ann. 1257. n. 48.
-
(e) Ab Apostolica Sede concessis: Confirmante diploma Willelmi Regis Romanorum anno 1250. m. Octobr. editum, & in dictis Annal. ad eum ann. num. 37. publici juris factum.
-
(f) Impugnare: Sed non multo post id ulterius non agere coacti sunt; nam insequenti anno Ezelinus, & subsequenti Albericus frater cum tota illorum stirpe infeliciter, merito tamen perierunt.
-
(g) Servos, et Ancillas: Nempe mancipia, & perpetuæ servituti, alteriusque dominio addicta more illorum temporum, & etiam istorum apud aliquas Nationes.