Description
-
Alexandre IV (1254-1261)
-
Idem Monasterium S. Franc. Clarissarum Tudertinum amplo privilegio ornat, atque munit; exemptionemque ab Episcopo, & Capitulo ejusdem Civitatis illi concessam confirmat. (Ex Autographo in Archivo Monasterii præfati dictæ Civitatis extante sub plumbo.)
-
Anno 1258. die 16. Junii.
-
1258
-
ALEXANDER &c.
Dilectis in Christo filiabus ‥ Abbatissæ, & Monasterii Sancti Francisci Tudertin.a , ejusque Sororibus tam præsentibus, quam futuris regularem vitam professis in perpetuum.
Religiosam vitam eligentibus &c.b Eapropter, dilectæ in Christo filiæ, vestris justis postulationibus clementer annuimus, & Monasterium Sancti Francisci Tudertin., in quo Divino estis obsequio mancipatæ ad instar felicis recordationis Innocentii PP.c prædecessoris nostri sub B. Petri, & nostra protectione suscipimus, & præsentis scripti privilegio communimus. In primis siquidem statuentes, ut Ordo monasticus, qui secundum Deum, & Beati Benedicti Regulam, atque institutionem Monialium inclusarum Sancti Damiani Assisinat., & formulam vitæ vestræ a felicis recordationis Gregorio PP. prædecessore nostro Ordini vestro traditam, cum adhuc esset in minori officio constitutus, perpetuis temporibus ibidem inviolabiliter observetur. Præterea quascumque possessiones, quæcumque bona idem Monasterium in præsentiarum juste, & canonice possidet, aut in futurum concessione Pontificum, largitione Regum, vel Principum, collatione Fidelium, seu aliis justis modis præstante Domino poterit adipisci, firma vobis, & eis, quæ vobis successerint, & illibata permaneant. In quibus hæc propriis duximus exprimenda vocabulis: locum ipsum, in quo præfatum Monasterium situm est, cum omnibus pertinentiis suis, cum vineis, terris, pratis, nemoribus, usuagiis, & pascuis in bosco, & plano, in aquis, & molendinis, in viis, & semitis, & omnibus aliis libertatibus, & immunitatibus suis. Liceat quoque vobis personas liberas, & absolutas a sæculo fugientes ad conversionem recipere &c.d Præterea omnes libertates, & immunitates, quas Monasterio vestro Venerabilis Frater noster J.e Urbevetan. tunc Tudertin. Episcopus indulsisse dinoscitur, sicut in ejus instrumento plenius continetur, auctoritate Apostolica confirmamus, & præsentis scripti privilegio communimus. Tenorem autem ipsius instrumenti præsenti privilegio inseri fecimus, qui talis est.
“In nomine Domini Amen. Sub Anno Domini mccli. tempore Domini Innocentii PP. Quarti Indictione nona die quarto intrante Aprili in Camera Donni Archidiaconi inferius nominati præsentibus Donno Johanne de Amelia, Donno Masseo Mainecto, Uguitione, & Detalleve testibus præsentibus rogatis, & vocatis. Nos quidem Jacobus Tudertin. Episcopus, & Rusticus Prior, & Capitulum Tudertin. scilicet &c.f”
Datum Viterbii per manum Magistri Jordani Sanctæ Romanæ Ecclesiæ Notarii, & Vice-Cancellarii xvi. Kalendas Julii Indictione I. Incarnationis Dominicæ Anno mcclviii. Pontificatus vero Domini Alexandri PP. IV. An. Quarto.g
Ego Alexander Catholicæ Ecclesiæ Episcopus subscripsi.
Ego Odo Tusculanus Episcopus subscr.
Ego Stephanus Prænestinus Episcopus subscripsi.
Ego Riccardus Sancti Angeli Diaconus Cardinalis subscripsi.
Ego Octavianus Sanctæ Mariæ in Via Lata Diaconus Card. subscripsi.
Ego Petrus Sancti Georgii ad Velum aureum Diaconus Card. subscripsi.
Ego Johannes Sancti Nicolai in Carcere Tulliano Diaconus Card. subscripsi.
Ego Ottobonus Sancti Adriani Diaconus Cardinalis subscripsi.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CDXXXI., p.294
-
(a) S. Francisci Tudertin.: De quo diximus ad Bullam 474. Innocentii IV. anno 1253. die 13. April. editam, & to. 1. hujus Operis p. 655. vulgatam.
-
(b) Eligentibus &c.: Ut in simili privilegio anno 1255. die 30. April. pro Monasterio S. Catharinæ Genuen. dato.
-
(c) Innocentii PP.: Hujus nominis IV. cit. Bullæ 474. pene ejusdem editoris.
-
(d) Recipere &c.: Adeas præfatum privilegium Monasterii S. Catharinæ Genuen.
-
(e) Frater noster J.: Jacobus, ut infra, hoc anno, vel superiori ad Urbevetanam Cathedram translatus.
-
(f) Tudertin. scilicet &c.: Videatur cit. Bulla 474. Innocentii IV. usque ad finem, & ad subscriptiones.
-
(g) Anno postea 1266. Sanctimoniales obtinuerunt a Petro Episcopo Tudertino facultatem ædificandi sibi aliud Monasterium in Civitate Tuderti velut in idoneori, ac tutiori loco, & istud extra Civitatem retinendi, litteris dat. die 14. Junii, quæ servantur in Archivo Monasterii Clarissarum S. Francisci dictæ Civitatis sub plumbo hujusce tenoris. “In Nomine Domini Amen. Anno ejusdem a Nativitate millesimo ducentesimo sexagesimo sexto, Indictione nona, tempore Domini Clementis Papæ IV. die quartadecima intrante mense Junii. Ex parte Abbatissæ & Sororum Monasterii S. Francisci Ordinis S. Damiani, positi prope Tudertum inter Monasterium Montis Sancti, & Ecclesiam S. Angeli de Sculca, nobis Petro miseratione Divina Tudertino Episcopo fuit humiliter supplicatum, ut cum ipsæ in idoniori, ac tutiori loco pro eis affectantes Domino famulari, domos quasdam in Civitate Tudertinen. Deo cooperante nuper adeptæ sint, in quibus ad honorem Dei, & Beati Francisci Ecclesiam, & locum habere, & ædificare cupiunt ad honestè & religiosè juxta ipsorum Ordinis statuta Domino dignis laudibus deservire; dignaremur eis concedere; ut ipsarum vota in hac parte feliciter adsequantur; nec non concessionem eis factam hactenus per Venerabilem Patrem Dominum J. Episc. prædecessorem nostrum, ‥ Priorem, & Capitulum Tudertinum de loco prædicto, ubi olim moratæ sunt, & exemptionem ipsis, & loco ipso factam; ut in Instrumento inde confecto manu Vivientii Notarii plenius continetur; Ecclesiam ipsam, Monasterium, & locum de novo construenda ab ipsis in Civitate prædicta una cum alio loco prædicto cum juribus, & pertinentiis suis; & ipsas etiam, ac alias succedentes, & advenientes post eas cum omnibus, quæ nunc habent, & possident, ac in futuro nancisci poterunt, pro Deo eximere deberemus; & insuper concedere, quod locum prædictum olim ab eis possessum cum juribus, & pertinentiis subsit eis pleno jure; & ipsum habeant, & possideant, sicut prius. Nos itaque ipsarum supplicationibus inclinati, ac volentes eis, quantum cum Deo possumus, gratiam ampliare, præsentibus, & consentientibus Domino Rustico Priore, Domino Ugolino Bonifatii, Domino Bonaventura, Magistro Angelario, Magistro Gentile, & Domino Ofreducio Canonicis Ecclesiæ Tudertinen.; & ipsi una nobiscum præfatis Abbatissæ, & Sororibus de gratia speciali concedimus, ut in domibus prædictis ad honorem Dei, & Beati Francisci Ecclesiam, & locum habeant, & ædificent, in quibus valeant Domino famulari: ac etiam concessionem sic eis factam a prædicto prædecessore nostro de loco prædicto, & exemptionem eis, & ipsi loco datam, prout in dicto instrumento plenius continetur, ratam & gratam habentes ipsam Abbatissam, & Sorores & omnes supervenientes, ac succedentes eis in locis prædictis, & ipsa loca cum juribus, & pertinentiis suis, & cum omnibus, quæ ipsæ, & loca ipsa nunc habent, & possident, & quæ in futuro dante Domino poterunt adipisci, eximimus, & ab omni nostra & Episcopali Jurisdictione duximus eximenda: Nec non volumus, & concedimus, quod locus prædictus, ubi moratæ sunt hactenus, prædicto loco, Ecclesiæ, sive Monasterio construendis ab ipsis subsit, ac pertineat pleno jure, ac locum ipsum cum omnibus juribus, & pertinentiis suis habeant, & possideant, sicut prius; ac etiam ipsæ, loca ipsa, & Ecclesia sic construenda ab eis, & aliæ succedentes eisdem gaudeant illa immunitate, ac illo privilegio, qua & quo alia loca religiosa Ordinis S. Damiani gaudere noscuntur; & quod libere possint ad velle ipsarum loca ipsa in suo Ordine reformare, perpetuo ordinare, corrigere, tractare, ac alias Christi devotas in locis ipsis sua auctoritate recipere, & retinere in eis, prout viderint expedire; dantes, & concedentes eisdem plenam licentiam, & liberam potestatem de locis præmissis, & omnibus bonis, juribus, & pertinentiis suis habitis, & habendis nunc & in futurum disponendi, ordinandi, tractandi, & dispensandi per se, vel per alias personas, prout de ipsarum processerit voluntate; nulla in nobis, vel in aliis de locis ipsis, juribus, & pertinentiis suis reservatione facta; solvenda tamen nobis Episcopo, & successoribus nostris ab ipsis Abbatissa, & Sororibus annuatim nomine census in festo B. Francisci media libra ceræ: Quæ vero omnia, & singula supradicta nos Episcopus, Prior, & Canonici per nos & nostros successores tibi Nicolao Machabrino Sindico dictarum Abbatissæ, & Sororum vice, & nomine ipsarum stipulanti, rata & firma perpetuo permittimus habituros, nec in aliis prædictorum contra facere, vel venire: Et ut præmissis omni tempore fides plenior habeatur, præsens instrumentum sigillorum nostri, & Capituli Tudertinen. munimine mandavimus roborari. Hæc acta sunt in logia Episcopatus Tudertinen. coram Domino Gerardo Machabrini, Domino Henrico Gilii Berardi, Ofredutio Joannis, Gualterio Canonico S. Mariæ in Monte, Petro Tudin., & Fratre Joanne Leonardi testibus præsentibus & rogatis. Die prædicta coram dictis testibus Dominus Ugolinus Canonicus Tudertin. juxta ostium cameræ suæ omnibus prædictis suum assensum præbuit & consensum. Et ego Egidius Dei gratia S. Romanæ Ecclesiæ Notarius prædictis interfui, & de mandato dictorum Domini Episcopi, Prioris, & Canonicorum subscripsi, & publicavi.