« bullarium-franciscanum-4995 »

Venerabili fratri Fortanerio patriarchae Graden., apostolicae sedis nuncio.

Gravis inter dilectos filios nobiles viros ducem Venetiarum et gubernatorem Ianuen. necnon Ianuen. civitatis et Venetiarum communia, procurante pacis aemulo, suborta dissensio amaricat graviter mentem nostram, pungit animum et viscera quaeque conturbat; in ea namque particularia dissidentium partium damna dispendiaque deflemus, in ea communia catholicae fidei detrimenta, in ea christiani populi maxime partium Orientis pericula deploramus. Quis enim zelator christiani nominis et honoris non defleat eos invicem dissidere ac per dissensionis huiusmodi periculosae ac dispendiosae discrimina debiliores effici, quos ad exaltationem et tutelam fidei et populi praedictorum gratiosos pugiles patenter aspexit? Quis non universalia detrimenta et pericula eorumdem fidei et populi defleat, in quos pagana gens, captata hinc opportunitate nocendi, velut effrenis saevit immanius, furit licentius et liberius debacchatur? Merito itaque ad ipsam perniciosam supputandam discordiam et radices ipsius, ne venenosis ex ea succrescentibus surculis priora detrimenta restauret, funditus evellendas et pacem propagatricem et matrem bonorum omnium reformandam inducimur et ab intimis praecordiis excitamur, ut dissidentes iidem pace mutua gaudeant et, ipsa pagana gente a persecutionis impetu refrenata, idem populus christianus ab angustiis et pressuris, eis per usum veteribus et per augmentum novis, utcumque respiret. Ideoque fraternitati tuae, de qua in magnis et arduis multa experientia et claris operum titulis approbata plenam in Domino fiduciam gerimus, per apostolica scripta mandamus, quatenus ad partes illas sub spe illius, qui concordiam in sublimibus suis parat et ad cuius nutum stat spiritus procellarum, te personaliter conferens salutaribus monitis et salubribus inductionibus tuis, iuxta datam tibi a Domino gratiam et virtutem, succidere huiusmodi pestilentem omnino discordiam ac radices illius extirpare funditus studeas et discordes ipsos ad concordiam sollicite revocare. Ut autem in praemissis eo favorabilius et facilius auctore Domino, cuius in hac parte negotium agitur, prospereris, quo maiori fueris per nos potestate munitus, tibi tractandi et ordinandi pacem et treugas indicendi et treugas et pacem huiusmodi opportunis firmitatibus spiritualibus et temporalibus roborandi, quascumque insuper uniones, colligationes, confoederationes, pacta et promissiones per quoscumque facta et inita, quatenus executioni praemissorum aut aliquorum vel alicuius ex eis directe vel indirecte derogare possent, etiamsi iuramentorum interpositionibus et poenarum adiectionibus vallata sint, dissolvendi et irritandi ac iuramenta et poenas huiusmodi relaxandi, turbatores quoque et impeditores et violatores pacis et treugarum huiusmodi nec non contradictores quoslibet et rebelles (cuiuscumque status, ordinis, gradus et praeeminentiae fuerint, etiamsi pontificali seu imperiali vel regia aut quavis alia praefulgeant dignitate) per censuram ecclesiasticam appellatione postposita compescendi, non obstante etc., plenam concedimus, tenore praesentium, facultatem. Sic igitur in praemissis omnibus te exhibeas, sicut de virtutum tuarum meritis plene confidimus, studiosum sicque diligentem etiam te impendas, quod ex operum tuorum seminibus fructus gratos et utiles colligamus tuque tanti boni promotor et actor claris attolli famae praeconiis et aeternae gloriae consequi praemia merearis. Datum apud Villam novam Avinionensis dioecesis IX kalendas novembris anno decimo.a