« bullarium-franciscanum-4919 »

Dilecto filio Palaczino de sancto Petro electo sanctae Iustae.

Regimini universalis ecclesiae etc. Dudum siquidem bonae memoriae Iacobo episcopo sanctae Iustae regimini sanctae Iustae ecclesiae ad eamdem Romanam ecclesiam nullo medio pertinentis praesidente, nos intendentes eidem ecclesiae, cum vacaret, per apostolicae sedis providentiam idoneam praeesse personam, provisionem ipsius ecclesiae sanctae Iustae ea vice ordinationi et dispositioni nostrae duximus specialiter reservandam etc. Postmodum vero praefata ecclesia sanctae Iustae per obitum eiusdem Iacobi, qui nuper extra Romanam curiam diem clausit extremum, pastoris solatio destituta, nos vacatione huiusmodi fide dignis relatibus intellecta ad provisionem ipsius ecclesiae celerem et felicem ... intendentes ... post deliberationem, quam super his cum fratribus nostris habuimus diligentem, demum ad te ordinis fratrum Minorum professorem, in sacerdotio constitutum, litterarum scientia praeditum, vitae ac morum honestate conspicuum, in spiritualibus providum et in temporalibus circumspectum ac aliis multiplicium virtutum meritis insignitum, prout fide dignorum assertione percepimus, direximus oculos nostrae mentis. Quibus omnibus diligenti meditatione pensatis de persona tua eidem ecclesiae sanctae Iustae de dictorum fratrum consilio auctoritate apostolica providemus teque illi praeficimus in episcopum et pastorem, curam et administrationem ipsius ecclesiae sanctae Iustae tibi tam in spiritualibus quam in temporalibus plenarie committendo etc. Datum Avinione, IV nonas septembris, anno octavo.

In eumdem modum archiepiscopo Arboren., capitulo ecclesiae s. Iustae, clero ac populo civ. et dioec. sanctae Iustae.