« bullarium-franciscanum-4795 »

Dilectis filiis vicario generalis ministri ac fratribus ordinis Minorum in vicaria Scotiae.

Inter ceteros ordines etc. Cum itaque, sicut accepimus, inclytae memoriae Robertus progenitor carissimi in Christo filii nostri David regis Scotiae illustris quemdam locum in villa de Lanark Glasguen. dioecesis vobis obtulerit et concesserit, dum adhuc ageret in humanis, et in toto regno Scotiae ordo vester in tribus dumtaxat dioecesibus sit locatus et exinde in partibus illis per guerrarum tyrannidem prae ceteris ordinibus sit depressus: nos, vos et ordinem ipsum volentes prosequi favorabiliter in hac parte, consideratione praefati David regis ac carissimae in Christo filiae nostrae Ioannae reginae Scotiae eius consortis nobis super hoc humiliter supplicantium ac vestris supplicationibus inclinati, vobis et ordini vestro praedicto recipiendi locum praefatum per eumdem Robertum regem vobis ut praefertur oblatum et concessum nec non unum alium locum per dictos David regem et Ioannam reginam seu eorum subditos, ab insultu hostium distantem, vobis et eidem ordini concedendum,a dummodo loca ipsa ad hoc sint idonea et in eorum quolibet duodecim fratres ipsius ordinis inibi pro tempore commorantes honeste ac congrue valeant sustentari, et in quolibet ex locis praedictis habendi et construendi ecclesiam seu oratorium cum campanili et campana et coemeterium et alias necessarias officinas, absque tamen praeiudicio parochialium ecclesiarum dictorum locorum et iuris cuiuslibet alterius alieni, fel. rec. Bonifatii papae VIII praedecessoris nostri ... et aliis constitutionibus contrariis nequaquam obstantibus, vobis plenam et liberam licentiam auctoritate praesentium elargimur. Nulli ergo etc. Datum Avinione III kal. decembris anno quinto.