Général
-
Clément VI (1342-1352)
-
Conrado de Marcha (Mark) ord. Min. converso, olim militi saeculari, concedit facultatem monasterium Clariss. de Clarenberg (prope Hörde) ab ipso fundatum (v. supra n. 107) devotionis causa ingrediendi ibique sepulturam suam eligendi.1
-
1345, iulii 23, Avinione.
-
1345
-
Dilecto filio Conrado de Marcha ordinis fratrum Minorum converso.
Devotionis tuae sinceritas, qua nos et Romanam revereris ecclesiam, promeretur, ut, quae a nobis suppliciter postulas, affectu tibi benevolo concedamus. Cum itaque, sicut e parte tua nuper accepimus, tu, qui nunc es in ordine fratrum Minorum novitius, olim miles saecularis existens, monasterium monialium in Clarembergh ordinis sanctae Clarae Colonien. dioecesis de bonis tuis propriis fundaveris et dotaveris et nunc in aetate decrepita constitutus existas: nos tuis supplicationibus inclinati, ut cum sex provectis et honestis fratribus tui praedicti ordinis dictum monasterium monialium, quibuscumque ipsius monasterii statutis et consuetudinibus et quibuslibet constitutionibus contrariis nequaquam obstantibus, libere ingredi, quando tibi videbitur, licite valeas, dummodo illius, quae ipsi monasterio praefuerit, ad id accedat assensus et tu dictique fratres ibidem non comedatis nec etiam pernoctetis, tenore tibi praesentium indulgemus. Nulli ergo etc. Datum Avinione X kalendas augusti anno quarto.a
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°325., pp.-164
-
Reg. Vat. t. 172 (Clem. VI a. 4, l. 4, p. 2), ep. 375; Wadd. l. c. reg. pont. Clem. VI n. 91. Cfr. supra n. 107.
1 -
(a) Aliis litteris eodem die datis S. P. eidem Conrado de Marcha concedit facultatem eligendi sepulturam in aliquo ipsius monasterii de Clarembergh loco idoneo. Reg. Vat. l. c. ep. 377, Wadd. l. c. n. 92.