Général
-
Clément VI (1342-1352)
-
Ministros provinciales et custodes ord. Min. in capitulo generali proxime congregandos hortatur, ut personam idoneam eligant in ministrum generalem.1
-
1343, maii 24, Avinione.
-
1343
-
Dilectis filiis ministris et custodibus fratrum ordinis Minorum in capitulo generali eiusdem ordinis celebrando Massiliae congregandis.
Cum inter cetera, quae in generali ordinis vestri capitulo celebrando Massiliae gerenda vobis, ut aestimamus, incumbunt, electio generalis ministri de nostro beneplacito ibidem immineat facienda, nos cupientes talem personam ipsius ordinis, quem gerimus in visceribus caritatis, in ministrum eligi, per cuius virtutes et merita dirigatur ad salutaria ipse ordo, sinceritatem vestram attentius in Domino exhortamur, quatenus habentes super his prae oculis solum Deum illam eligatis ad ministeriatum praedictum personam, quam secundum Deum et vestras conscientias utiliorem credideritis ordini supradicto; si vero haec in persona dilecti filii Fortanerii Vassalli eiusdem ordinis et sacrae theologiae professoris, auctoritate apostolica curam et administrationem ministeriatus praedicti gerentis, cuius eminentiam scientiae et virtutes multas nos perspectas habemus, videritis concurrere sicque ipsum esse praedicto ministeriatui sufficientem et idoneum credideritis, gratum esset nobis et placabile, si ad onus eligeretur illius. Super quibus omnibus cum omni sinceritate et puritate conscientiae procedatis. Datum Avinione IX kalendas iunii anno secundo.a
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°203., pp.-125
-
Reg. Vat. t. 137 (secr. Clem. VI a. 2), ep. 28; Wadd. l. c. ad a. 1343 n. 6.
1 -
(a) In illo capitulo, cui Elias (de Nabinalis ex ord. Min.) S. R. E. cardinalis interfuit, ipsum Fortanerium in ministrum generalem esse electum nemo ignorat. « In quo capitulo fuit ordinatum, quod de cetero servarentur constitutiones domini Bonaventurae cum aliquibus addendis tamquam ordinis (Minorum) fundamenta, aliis statutorum compilationibus revocatis (cfr. supra p. 47 not. 1). Item, quod in festo s. Trinitatis diceretur officium compositum per dominum fratrem Ioannem de Pecchamo (ord. Min., archiepiscopum Cantuarien. 1279-1292) et in festo s. Ludovici episcopi (Tolosan. ex ord. Min.) officium compositum per dominum regem (Siciliae) Robertum, eius germanum. » Quod quidem officium unacum quibusdam aliis a Pio V suppressum est. Cfr. Chron. XXIV Gener. (Anal. Francisc. III, 538).