« bullarium-franciscanum-4518 »

Dilecto filio Antonio de Aribandis de Valentiaa electo Gaietan.

Ad universalis ecclesiae regimen etc. Olim siquidem ecclesia Gaietana, eidem Romanae ecclesiae immediate subiecta, per obitum bonae memoriae Francisci episcopi Gaietani, qui in illis partibus debitum naturae persolvit, pastoris solatio destituta, dilecti filii capitulum ipsius ecclesiae (vocatis omnibus, qui debuerunt, voluerunt et potuerunt commode interesse) die ad eligendum praefixa, ut moris est, convenientes in unum ac deliberantes in ipsius electionis negotio per formam procedere compromissi, sex fide dignis (videlicet Matthaeo Gattuli s. Mariae foris portam, Roberto Spatario s. Nicolai, Guitano Pice s. Ioannis ad mare saecularium prioribus, Ioanni archipresbytero Spinei Gaietan. civitatis et dioecesis, Henrico Bono canonico Salernitan. ecclesiarum, et Bertrando Arnaldi clerico Apten.) providendi ea vice ipsi ecclesiae de pastore concesserunt unanimiter liberam potestatem, promittentes illum recipere et habere in eorum et Gaietan. [ecclesiae] episcopum, quem dicti compromissarii de se ipsis vel aliis concorditer ducerent eligendum; dicti vero compromissarii huiusmodi potestate recepta secedentes in partem post deliberationem, quam inter se habuerunt super huiusmodi negotio diligentem, demum in te ordinis fratrum Minorum, sacrae theologiae professorem, in sacerdotio constitutum, vota sua concorditer direxerunt, ac subsequenter praefatus archipresbyter ex potestate huiusmodi sibi et eisdem collegis suis ut praemittitur tradita, de ipsorum ibi praesentium mandato, vice sua et collegarum nec non capituli praedictorum nomine te in episcopum Gaietanum elegit ac electionem huiusmodi a dictis capitulo concorditer acceptam clero et populo solemniter publicavit; tuque, post consensum eidem electioni de superioris tui licentia, ipsius tibi praesentato decreto, ad instantiam dictorum capituli a te legitime praestitum, ad sedem apostolicam personaliter accessisti et tam tu per te ipsum quam dicti capitulum per certos procuratores eorum et nuncios idoneos ab eis propterea ad nos specialiter destinatos confirmari per nos electionem praefatam, ipsius nobis praesentato decreto, humiliter postulastis, in his omnibus statutis a iure temporibus observatis. Nos igitur electionem praefatam tuaeque personae merita per venerabilem fratrem Bertrandum episcopum Ostien. et dilectos filios nostros Talayrandum tituli s. Petri ad Vincula presbyterum ac Ioannem s. Angeli diaconum cardinales examinari fecimus diligenter; et facta nobis super his ab eisdem episcopo et cardinalibus relatione plenaria et fideli, quia invenimus electionem eamdem de te persona idonea, religionis zelo, vitae munditia, litterarum scientia aliisque virtutum meritis multiplicibus laudabiliter insignita, canonice celebratam, eam de fratrum nostrorum consilio auctoritate apostolica confirmamus teque ipsi Gaietanae ecclesiae praeficimus in episcopum et pastorem, curam et administrationem ipsius tibi tam in spiritualibus quam in temporalibus plenarie committendo etc. Datum Avinione VIII kalendas iunii anno septimo.

In eumdem modum capitulo ecclesiae Gaietan., clero et populo civitatis et dioecesis Gaietanae, carissimo in Christo filio Roberto regi Siciliae illustri.