« bullarium-franciscanum-4516 »

Venerabili fratri Nicolao episcopo Assisinaten., nostro in spiritualibus in Urbe vicario.

Inter curas multiplices, quas iniunctum nobis desuper officium apostolicae servitutis indicit, illa sollicitat potissimum mentem nostram, ut providere, quantum nobis ex alto permittitur, procuremus, quod urbs Romana, in qua nostri sedem apostolatus caelestis dispensatio statuit et firmavit ecclesiae fundamenta, pacis ubertate gaudeat et ad salutaria dirigatur, fidelesque degentes ibidem, quorum nobis cura imminere specialiter noscitur, alimentis spiritualibus non fraudentur. Sane cum, sicut ad nos perlatum extitit, his diebus bonae memoriae Ioannesa episcopus Anagnin., noster in eadem Urbe in spiritualibus vicarius, pridem fuerit in partibus illis viam universae carnis ingressus, nos prospicere salubriter super his paternae sollicitudinis studio cupientes et ad te, quem litterarum scientia, puritate fidelitatis, maturitate discretionis, morum et probitatis honestate aliisque virtutum meritis adiuvari confidimus, nostrae considerationis intuitum convertentes, te in Urbe supradicta eiusque suburbiis et districtu vicarium nostrum in spiritualibus usque ad nostrum beneplacitum tenore praesentium constituimus ac etiam deputamus, visitandi ecclesias, monasteria et loca ecclesiastica, saecularia et regularia quorumcumque ordinum, non exempta nec privilegiata, et tam ecclesiarum, monasteriorum et locorum ipsorum quam alias personas ecclesiasticas urbis, suburbiorum et districtus praedictorum, cuiuscumque status, ordinis vel conditionis existant, nec non reformandi, quae in eis reformationis ministerio noveris indigere, ac earum et cuiuslibet ipsarum excessus et crimina corrigendi et puniendi aliaque faciendi et exercendi auctoritate nostra, quae ad huiusmodi vicariatus officium pertinere noscuntur, contradictores quoque per censuram ecclesiasticam appellatione postposita compescendi (non obstante, si aliquibus communiter vel divisim ab eadem sit sede indultum, quod interdici, suspendi vel excommunicari non possint per litteras apostolicas non facientes plenam et expressam ac de verbo ad verbum de indulto huiusmodi mentionem) tibi facultatem plenariam concedentes. Quocirca fraternitati tuae per apostolica scripta mandamus, quatenus onus vicariatus huiusmodi devote suscipiens, sic illud prudenter et fideliter studeas exercere, quod proinde divinam et nostram dictaeque sedis gratiam valeas uberius promereri. Datum Avinione XVII kalendas maii anno septimo.