« bullarium-franciscanum-4508 »

Dilecto filio ‥ ministro provinciali ordinis fratrum Minorum in provincia Provinciae.

Pia religiosarum desideria etc. Sane petitio dilectae in Christo filiae Bertrandae Morese de Valleriaco monialis monasterii Maioricarum ordinis s. Clarae nobis exhibita continebat, quod ipsa per longum tempus in eodem ordine sub regulari habitu duxit laudabiliter vitam suam et pro utilitate dicti ordinis per mare et terram honeste et fideliter laboravit, ita quod eiusdem ordinis commoda prosequendo senio est et imbecillitate confracta nec potest de cetero solitos sustinere labores, quodque quaedam socia sua, quae unacum ea fructuose diu pro commodis dicti ordinis laboravit, viam est universae carnis ingressa, dictaque Bertranda depressa laboribus et senectute gravata tantam sui corporis debilitatem incurrit, quod nequit ulterius laborare: propter quod ipsa de provincia Provinciae oriunda certis ex causis ad dictum monasterium Maioricarum redire non valens desiderat in conventu monasterii sororum Sistaricen. eiusdem ordinis una cum dilectis in Christo filiabus ‥ abbatissa et conventu eiusdem monasterii sub clausura Domino famulari et ibidem finire residuos dies suos. Nos igitur pium et laudabile eiusdem Bertrandae desiderium in hac parte, quantum cum Deo possumus, prosequi intendentes, discretioni tuae per apostolica scripta committimus et mandamus, quatenus per te vel per alium seu alios dictam Bertrandam auctoritate nostra facias in dicto monasterio Sistaricen. recipi in monacham et sororem sibique in victu et vestitu sicut uni ex aliis eiusdem monasterii sororibus provideri eamque ibidem sincera in Domino charitate tractari. Non obstantibus etc. Dat. Avinione IX kal. aprilis anno sexto.