« bullarium-franciscanum-4504 »

Dilectis filiis ‥ praeposito s. Petri Argentinen. et ‥ scholastico Tullen. ac ‥ cantori Werden. Constantien. dioec. ecclesiarum.

Significaverunt nobis dilecti filii Burkardus de Warembach canonicus s. Amarini et mag. Henricus Socherlin (!) rector in Hugswirl ecclesiarum Basilien. et Argentinen. dioecesium, quod olim ad instantiam eiusdem Burkardi significantis nobis, quod ipse super provisione sibi facienda de beneficio ecclesiastico sine cura competenti, spectante communiter ad collationem seu praesentationem dilectorum filiorum ‥ praepositi et capituli eiusdem ecclesiae s. Amarini, nostras sub ea forma, secundum quam pro pauperibus clericis beneficiandis tunc scripsimus ad certos executores, litteras impetrarat et quod postea quibusdam canonicatu et praebenda in ecclesia praedicta vacantibus, spectantibus communiter ad collationem praepositi et capituli praedictorum, qui iuxta dictarum litterarum formam dicto Burkardo competens beneficium existebant quique sibi de iure per dictas litteras debebantur, eidem Burkardo fuerat de illis earundem litterarum auctoritate provisum, a qua quidem provisione Iohannes Henrici dicti Haken, qui pro custode dictae ecclesiae se gerebat, ad sedem apostolicam appellarat: qua quidem appellationis et negotii principalis causa ad eandem sedem legitime devoluta et apud sedem eandem inter praefatos Iohannem et Burkardum diutius ventilata demum idem Burkardus apud dictam sedem duas pro se diffinitivas sententias reportarat, vobis super executione ipsarum sententiarum executoribus in solidum deputatis; quodque, cum tu, fili scholastice, solus in executione huiusmodi, prout ex ipsarum litterarum forma poteras procedere, incepisses ac vices tuas in hac parte dicto rectori commisisses, donec eas ad te duceres revocandas, idemque rector una cum dicto Burkardo ad praedictam ecclesiam s. Amarini se personaliter contulisset, ut processus super praemissis per te habitos inibi publicaret, Hertwigus advocatus, Nicolaus dictus Smit scultetus, Ulricus de Adren villanus villae in Ufhoke, Chunmannus natus Werneri de Schoenberggener, Chenzelinus familiaris eiusdem Henrici dicti Haken, et Burschimannus natus Rucheri procuratoris de Phurt, laici Basiliensis dioecesis, adiunctis sibi quibusdam aliis nephariis in hac parte complicibus, in eosdem magistrum Henricum rectorem et Burkardum ausu sacrilego irruentes, in eos iniectis manibus temere violentas, ipsos graviter percusserant rebusque eorum temere spoliarant eosque carceri manciparant, licet dictus rector de dicto carcere postmodum evasisset. [Quare] nos vobis dedimus nostris litteris in mandatis, ut vos vel duo aut unus vestrum per vos vel per alium seu alios contra eosdem sacrilegos et quoscunque alios dicti Burkardi detentores per excommunicationis, suspensionis et interdicti sententias aliisque viis et modis, quibus expedire videritis, procederetis, ut eundem Burkardum de praedicto carcere liberarent (sibi et dicto rectori rebus sublatis eisdem integraliter restitutis; invocato ad hoc, si opus esset, auxilio brachii saecularis) ac nihilominus dictos sacrilegos, si de huiusmodi manuum iniectione et carceris mancipatione vobis constaret, tamdiu in omnibus locis, ubi videretis expediens, excommunicatos publice nuntiaretis et per alios nuntiari faceretis et ab omnibus arctius evitari, donec satisfecissent passis iniuriam competenter et cum vestrarum testimonio litterarum ad sedem venirent apostolicam absolvendi.

Cumque, sicut accepimus, dilectus filius ‥ praepositus ecclesiae s. Thomae Argentinensis, cui tu, fili cantor, solus in praemissorum executione procedens, prout ex ipsarum poteras beneficio litterarum, commiseras non totaliter vices tuas, contra dictos sacrilegos eorumque fautores pro eo, quod eosdem Burkardum et magistrum Henricum rectorem iniectis in eos manibus violentis rebusque ipsorum ablatis ceperant et carceri manciparant dictumque Burkardum per plures menses detinuerant captivatum, cum de hoc dicto praeposito legitime constitisset, iuxta dictarum litterarum vobis directarum formam denuntiando, dictos sacrilegos propter iniectionem, captionem et detentionem praedictas excommunicationis fore sententia innodatos, legitime processisset dictosque sacrilegos tanquam excommunicatos mandasset ab aliis arctius evitari, eiusque processibus a venerabili fratre nostro ‥ episcopo Basiliensi totoque clero ac religiosis omnium ordinum tam exemptorum quam non exemptorum devote et humiliter pareretur: tamen ‥ fratres ordinis Minorum et praesertim ‥ guardianus et conventus loci fratrum dicti ordinis in Tanne dictae Basiliensis dioecesis (de conniventia Iohannis de Ravensburg ministri provincialis et Rodulphi Vicedomini custodis custodiae Basiliensis provinciae superioris Alamaniae, praelatorum suorum), asserentes se fore privilegiatos a sede apostolica, quod per iudices delegatos sedis eiusdem et locorum ordinarios ac vos et subdelegatos vestros compelli non poterant ad executionem aliquam faciendam, noluerunt super praemissis dicto praeposito obedire, quinimo sententiam interdicti auctoritate dictarum litterarum nostrarum per dictum praepositum in certis locis et ecclesiis promulgati praesumpserunt violare temere et praesumunt, ex hoc gravem inobedientiam committendo in animarum suarum periculum, gravem exempli perniciem et scandalum plurimorum; propter quod praefati Burkardus et magister Henricus ad nos super hiis duxerunt humiliter recurrendum. Quocirca discretioni vestrae per apostolica scripta mandamus, quatenus vos vel duo aut unus vestrum per vos vel per alium seu alios eisdem ministro provinciali ac custodi et guardiano necnon conventui eiusdem domus in Tanne auctoritate nostra districtius iniungatis, quod interdictum praefatum debeant observare ac eosdem sacrilegos excommunicationis sententia innodatos propter huiusmodi iniectionem manuum in dictos clericos et detentionem eorum necnon alias per nos seu auctoritate nostra propter eorum inobedientiam et contumaciam excommunicationis sententia innodatos ad divina in eorum ecclesiis non admittant, sed eos evitent, donec ab excommunicatione praedicta absolutionis beneficium meruerint obtinere (non obstantibus quibuscumque privilegiis eisdem fratribus vel eorum ordini ab apostolica sede concessis, etiam si de verbo ad verbum oporteret de illis in praesentibus fieri mentionem, quae quoad haec in nullo ipsis volumus suffragari), eosque ad id, si expedierit, per censuram ecclesiasticam appellatione postposita compellatis. Dat. Avinione II kal. novembris anno quinto.