Général
-
Benoît XII (1334-1342)
-
Fratribus Min. Agennen. (Agen) in prov. Aquitaniae ad alium locum infra muros civ. Agennen. se transferendi facultatem concedit.1
-
1336, 21 martii, Avinione.
-
1336
-
Dilectis filiis guardiano et fratribus ordinis Minorum Agennen.
Sacra vestra religio referta virtutum fecunditate meretur, ut vos illa gratia favorabiliter prosequamur, quae vestris fore asseritur necessitatibus opportuna. Sane petitio pro parte vestra nobis nuper exhibita continebat, quod locus vester, quem extra muros civitatis Agennen. habetis ad praesens, iuxta fluvium Garonae situatus existit, cuius fluvii impetus inundantis ibidem dictum locum pro maiori parte dextruxit, et quod dicta civitas propter guerrarum discrimina, quae in illis partibus frequenter suscitantur, clauditur fossatis et muris, quodque officiales carissimi in Christo filii nostri Philippi regis Franciae illustris nec non et cives civitatis eiusdem dixerunt vobis, quod, si guerra in praedictis partibus inciperet, statim diruerent dictum locum. Quare nobis humiliter supplicastis, ut acquirendi legitime et recipiendi alium locum aptum et congruum infra dictos muros civitatis eiusdem (praesertim cum ad hoc, ut asseritis, venerabilis fratris nostri episcopi Agennen. et officialium dicti regis ac civium civitatis eiusdem accedat assensus) ibique ecclesiam, claustrum et alias officinas necessarias construendi, vosque de ipso loco priori ad dictum locum alium per vos infra dictos muros ut praemittitur acquirendum transferendi, inibi Domino servituros, ipsumque locum priorem ad opus vestrum et pro secundo loco huiusmodi acquirendo alienandi et de eo disponendi, prout vobis expedire videretur, licentiam largiremur. Nos itaque volentes statui vestro, ut liberius et quietius possitis Domino famulari, providere salubriter in hac parte, dilecti filii Geraldi generalis ministri vestri ordinis nobis super hoc humiliter supplicantis ac vestris supplicationibus inclinati, faciendi praemissa omnia et singula (absque tamen praeiudicio parochialis ecclesiae dicti loci secundi et iuris cuiuslibet alterius alieni, constitutione fel. rec. Bonifacii papae VIII praedecessoris nostri super hoc in contrarium edita et quacumque alia non obstante) auctoritate vobis praesentium plenam et liberam licentiam impertimur: proviso, quod ecclesia et coemeterium eiusdem prioris loci, in qua quidem ecclesia per unum presbyterum faciatis in divinis officiis celebrandis deserviri, ad clericos seu laicos sicut hereditas minime transferantur. Nulli ergo etc. Datum Avinione XII kalendas aprilis anno secundo.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°24., p.16
-
Reg. Vat. t. 121 (Ben. XII a. 2, p. 2), ep. 357 (579); Wadd. l. c. n. 20.
1