« bullarium-franciscanum-4385 »

Dilecto filio Itherio de Concoreto archidiacono Londonien., nostro et apostolicae sedis in Anglia nuncio.

Pro parte dilectarum in Christo filiarum abbatissae et conventus monasterii de Waterbechea ordinis sanctae Clarae Elien. dioecesis nobis extitit humiliter supplicatum, ut ecclesiam de Bydinh Lincolnien. dioecesis, quae, ut asseritur, de earum patronatu existit cuiusque fructus, redditus et proventus quindecim marcharum argenti secundum taxationem decimae valorem annuum non excedunt, mensae earumdem per te uniri et appropriari auctoritate apostolica mandaremus. Nos igitur volentes de praemissis plenius informari, discretioni tuae, de qua plenam in Domino fiduciam obtinemus, per apostolica scripta committimus et mandamus, quatenus, utrum dictae abbatissa et conventus sine unione huiusmodi possint sustentari sufficienter vel non, et an dicta ecclesia de earum patronatu ut praefertur existat, ac de ipsius ecclesiae redditibus auctoritate nostra diligentius te informes, et quaecumque super his per informationem huiusmodi repereris, nobis per tuas patentes litteras vel instrumentum publicum, harum seriem continentia, sub tuo sigillo quam citius fideliter referre et intimare procures. Datum Avinione, VII kalendas octobris, anno decimo nono.