« bullarium-franciscanum-4300 »

Ioanni episcopo Calvensi.

Pastoralis officii etc. Dudum siquidem bonae memoriae Henricoa episcopo Isernien. regimini Isernien. ecclesiae praesidente ... provisionem ipsius ecclesiae ea vice dispositioni nostrae ac sedis eiusdem duximus specialiter reservandam, decernendo ex tunc irritum etc. Ac deinde praefato Henrico episcopo in illis partibus viam universae carnis ingresso, dilecti filii capitulum eiusdem ecclesiae, huiusmodi reservationis et decreti forsan ignari, te ordinis fratrum Minorum professorem et in sacerdotio constitutum in Isernien. episcopum quamvis de facto concorditer elegerunt, tuque huiusmodi reservationis et decreti, sicut asseritur, inscius dictae electioni de tui superioris licentia ad dictorum capituli instantiam praestans assensum obtinuisti electionem huiusmodi a ven. fratre nostro archiepiscopo Capuano, loci metropolitano, reservationem et decretum praedicta similiter ignorante, auctoritate metropolitica confirmari et subsequenter te in Isernien. episcopum consecrari. Verum quia electio et confirmatio supradictae, utpote post et contra reservationem et decretum huiusmodi attentatae, erant irritae et inanes, tu nullius ecclesiae episcopus remansisti. Postmodum vero ecclesia Calven.b per obitum bonae memoriae Thadaei episcopi Calven., qui in partibus illis diem clausit extremum, pastoris solatio destituta, nos vacatione huiusmodi ipsius Calven. ecclesiae fide dignis relatibus intellecta ... provisionem ipsius ecclesiae Calven. dispositioni nostrae et sedis eiusdem ea vice modo simili duximus reservandam etc. Ac deinde considerantes, quod nullus praeter nos de ordinatione praefatae ecclesiae Calven. post reservationem et decretum praedicta ultimo per nos facta se hac vice intromittere poterat, de praeficiendo eidem ecclesiae Calven. personam utilem ac etiam fructuosam, ne longae vacationis deploraret incommoda, cogitare coepimus diligenter; et post deliberationem, quam cum fratribus nostris habuimus diligentem, ad te, de multiplicium virtutum meritis apud nos fide digno testimonio commendatum, aciem direximus nostrae mentis. Quibus omnibus attente discussis, de persona tua eidem Calven. ecclesiae de fratrum eorumdem consilio auctoritate apostolica providemus teque illi praeficimus in episcopum et pastorem, curam et administrationem illius tibi tam in spiritualibus quam in temporalibus plenarie committendo etc. Datum Avinione, III kal. novembris, anno decimo septimo.c