« bullarium-franciscanum-4209 »

Venerabilibus fratribus ‥ Wyntoniensi, ‥ Conventrensi et Lichefeldensi ac ‥ Londoniensi episcopis.

Ex serie petitionis dilecti filii Edmundi comitis Kantiae, primogeniti et heredis quondam Edmundi comitis Kantiae patris sui, et dilectae in Christo filiae nobilis mulieris Margaretae relictae eiusdem quondam Edmundi viduae nobis oblatae percepimus, quod idem Edmundus comes defunctus, dum viveret, in plena sospitate consistens in suo ultimo testamento electionem ecclesiae suae sepulturae electioni et dispositioni eiusdem coniugis suae, si eum illi praemori contingeret, commisit, et quod morte eiusdem comitis subsecuta corpus ipsius absque electione eiusdem coniugis in ecclesia fratrum ordinis Minorum Wyntoniensiuma extitit tumulatum. Nos igitur, qui tueri debemus pias defficientium voluntates, dictorum primogeniti et coniugis supplicationibus inclinati, fraternitati vestrae per apostolica scripta mandamus, quatenus vos vel duo aut unus vestrum, si est ita et dicta Margareta pro corpore eiusdem defuncti comitis elegerit seu eligat in ecclesia monasterii Westmonasterii ordinis s. Benedicti Londoniensis dioecesis ecclesiasticam sepulturam, dictum corpus ad requisitionem eiusdem Margaretae faciatis de dicta ecclesia exhumari et adportari, expensis tamen primogeniti et heredis ac Margaretae praedictorum, ad praedictam ecclesiam monasterii memorati, in qua regalium defunctorum Angliae consueverunt corpora sepeliri, ut corpus eiusdem Edmundi comitis defuncti cum dictis regalibus ecclesiasticam ibidem habeat et recipiat sepulturam: contradictores per censuram ecclesiasticam appellatione postposita compescendo, non obstantibus etc. Datum Avinione, III idus aprilis, anno quintodecimo.