Général
-
Jean XXII (1316-1334)
-
Ad instantiam priorissae et conventus mon. s. Saturnini Tolosan., ord. can. s. Aug., quas b. m. Vitalis (de Furno ex ord. Min.) episcopus Albanen.1 universales heredes ultimo suo testamento, quod quidem a quibusdam iurisperitis invalidum habetur, instituit, compatiens ipsarum monialium paupertati necnon guardianum et fratres Minores Tolosan., prout in hac parte tanguntur, aliosque legatarios respiciens oculo pietatis, circa ultimam ipsius Vitalis episcopi Albanen. voluntatem haec ordinat: « In primis videlicet, quod quingenti floreni auri, qui legati fuerunt per eundem episcopum in huiusmodi sua ultima voluntate sive ordinatione pro emendis per easdem priorissam et conventum redditibus bladi censualis, tradendis dictis guardiano et fratribus Tholosanis ...., pro reparatione ecclesiae suae assignentur manualiter et tradantur dictaeque priorissa et conventus ab huiusm. emptione et traditione dicti bladi ex nunc sint penitus liberae et totaliter absolutae. Insuper cum idem episcopus deputaverit .... expendi tria millia florenorum auri pro dilatando loco dictarum priorissae et conventus et pro nova ipsarum ecclesia construenda, volumus et etiam ordinamus quod dicta tria millia florenorum .... dictae priorissae et conventui assignentur manualiter et tradantur: ita tamen, quod de ipsis tribus millibus florenorum emantur possessiones seu redditus annui ad opus dictarum priorissae et conventus etc. Ordinamus etiam, volumus et mandamus, quod omnia iocalia, ornamenta et paramenta, consistentia in auro seu argento, albo vel deaurato, necnon pannis purpureis (cum pernis seu sine pernis) seu sericis aut lineis et cortinis quibuscunque et tapetis, quae praefatus episcopus in dicta sua ultima voluntate seu ordinatione voluit penes easdem priorissam et conventum perpetuo esse ad cultum et usum divinum, ..... dictis priorissae et conventui seu procuratori earum assignentur manualiter et tradantur et sint et remaneant libere apud eas. Praeterea cum idem episcopus .... voluerit accipi quingentos florenos auri de huiusmodi bonis suis pro emendis domibus, ubi dicta nova ecclesia construatur, ordinamus, volumus et mandamus, quod dicti quingenti floreni .... eisdem priorissae et conventui seu procuratori ipsarum assignentur manualiter et tradantur. Similiter, cum idem episcopus .... mille florenos de dictis bonis suis voluerit accipi pro una capella fundanda et dotanda hoc modo, videlicet quod de ipsis mille florenis emerentur censuales possessiones bladi et vini, de quibus ipsae priorissa et conventus dare tenerentur capellano inibi deputando (in pecunia vel in aliis rebus) et duobus confessoribus suis fratribus ordinis Minorum in pecunia certas annis singulis in certis terminis quantitates, et bladum et vinum, quae de residuo mille florenorum ipsorum emi poterant, penes dictas priorissam et conventum pro earum necessitatibus remanerent; ordinamus, volumus et mandamus, quod .... dicti mille floreni eisdem priorissae et conventui vel earum procuratori assignentur manualiter et tradantur et remaneant apud eas: ita tamen, quod dictae priorissa et conventus unum capellanum, qui pro anima dicti defuncti in eadem ecclesia continue celebret, tenere perpetuis temporibus teneantur. Praeterea, licet dictus episcopus in huiusmodi sua ultima voluntate voluisset seu etiam ordinasset, quod Guillelmus Astre et Guillelmus Vicecomitis ordinis Minorum, consiliarii et executores sui, vel alter ipsorum peterent a ven. fratre nostro Petro episcopo Portuensi, camerario collegii cardinalium S. R. E.... omnia, quae sibi debebantur ratione censuum vel reddituum seu communium servitiorum usque ad diem obitus sui, et illa pro ipsius anima erogarent: ordinamus tamen, volumus et mandamus, quod totam pecuniam dicto episcopo Albanensi per dictum camerarium eiusdem collegii de praedictis debitam idem camerarius vel successor ipsius in huiusmodi officio camerariatus dicti collegii praelibatis priorissae et conventui seu procuratori earum tradant integraliter et assignent exceptis mille florenis, quos tradent dicto Guillelmo Astre per eum distribuendos pro defuncti anima supradicti. Ordinamus etiam, volumus et mandamus, quod bladum censuale, quod est in Manso sanctarum puellarum et in Castronovo de Arrio et in aliis locis adiacentibus s. Papuli diocesis, alias per dictum episcopum Albanensem ipsis priorissae et conventui datum, penes ipsas priorissam et conventum remaneat libere atque pure. Praeterea, quia dilectus filius Bernardus Raynerii dicti ordinis fratrum Minorum per eundem episcopum Albanensem fuit super ministrandis et faciendis expensis opportunis ad constructionem ipsius ecclesiae deputatus, ordinamus, volumus et mandamus, quod idem Bernardus teneatur... de pecunia per eum recepta et soluta pro causa praemissa reddere finalem et debitam rationem, et pecuniam, si qua inveniatur seu esse debeat residua apud eum, idem Bernardus tradat dictis priorissae et conventui in constructionem dictae ecclesiae convertendam, ipsaeque priorissa et conventus de receptis et solutis per rationem huiusmodi seu assignatis per eundem Bernardum eisdem ipsum absolvere debeant et quitare. Declaramus insuper, volumus et mandamus, quod praefatae priorissa et conventus ab omnibus aliis in dicto instrumento eiusdem testamenti seu ultimae voluntatis dicti Vitalis episcopi contentis et scriptis ex nunc sint liberae penitus et quietae: ita quod super illis vel eorum aliquo vel ex quacunque alia ratione vel causa contenta vel expressa in testamento praedicto (praeterquam super hiis, quae supra vel infra per nos ordinata existunt) nichil habeant facere, expedire, tractare vel agere ammodo cum guardiano et fratribus Minoribus memoratis, vel dicti guardianus et fratres Minores cum priorissa et conventu praefatis, et quod dictae priorissa et conventus sint contentae de praemissis, ita quod nichil plus petere possint in et de bonis, quae quondam fuerunt dicti Vitalis episcopi, quam prout est superius ordinatum. Eisdem quoque priorissae et conventui auctoritate apostolica perpetuo interdicimus omnem venditionem, distractionem seu alienationem quamcumque (sub quovis alienationis genere, specie seu colore) iocalium, ornamentorum seu paramentorum, possessionum et reddituum praedictorum seu alicuius vel aliquorum ex illis .... Volumus insuper et mandamus, quod solutio legatorum et emendarum et relictorum per dictum Vitalem episcopum Albanensem, quae omnia facta erant per executores et consiliarios per eum ad hoc specialiter deputatos, tam in curia Romana quam in partibus Tholosanis, quae ascendunt, sicut asserunt executores praefati, ad summam 19922 floren. auri, sit firma et stabilis pro salute animae episcopi memorati, nec ipsis legatariis aliqua moveri possit controversia super eis, etiam si appareat, dictum testamentum aliquatenus non valere ».2
-
1328, maii 28, Avinione.
-
1328
-
Ad perpetuam rei memoriam.
Inter universa opera divinae placita voluntati etc. Dat. Avinione, V kal. iunii, anno duodecimo.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°710., p.345
-
Qui die 23 dec. 1312 in presb. card. (tit. s. Martini in mont.) prom. et a. 1321 ad eccl. Albanen. transl. die 16 aug. 1327 obiit.
1 -
Reg. Vat. t. 88, f. 183, ep. 3491. Supra n. 290 facultas testandi domino Vitali card. concessa exhibetur.
2
Informations
Acte
bullarium-franciscanum
admin
(IRHT), dans
Bullarium Franciscanum
Bullarium Franciscanum romanorum pontificum, dir. I. Heullant-Donat, éd. électronique TELMA (IRHT), Orléans, 2021 [en ligne], acte n. 155919 (bullarium-franciscanum-4006), http://telma.irht.cnrs.fr/chartes/bullarium-franciscanum/notice/155919 (mise à jour : 26/01/2021).