« bullarium-franciscanum-3995 »

Dil. filio ‥ rectori ducatus Spoletan.

Sua nobis dilectae in Christo filiae abbatissa et conventus mon. Vallis gloriae ord. s. Clarae Spoletan. dioc. gravi conquestione monstrarunt, quod dilecti filii Ioannes abbas mon. s. Silvestri de monte Subasio ord. s. Ben. et Iacobus de Spello miles eiusdem Spoletan. dioc. easdem abbatissam et conventum in suis et eiusdem monasterii iuribus, bonis et possessionibus molestare et inquietare ac perturbare per se suosque complices et fautores multipliciter non verentur, bladum, vinum et alia bona ipsarum occupando, diripiendo et vastando nequiter in earum grave praeiudicium et iacturam; quare nobis humiliter supplicarunt, ut providere sibi super hoc de opportuno remedio dignaremur. Nos autem easdem abbatissam et conventum sic in tranquillitate confoveri volentes et pace, quod turbatione semota possint liberis mentibus Domino famulari, discretioni tuae per apostolica scripta mandamus, quatenus eas in suis et eiusdem sui monasterii bonis, iuribus et possessionibus ab omni violentia et oppressione indebita tam praedictorum abbatis et militis quam aliorum quorumcumque defendens non permittas eas a praedictis abbate et milite vel ab aliis quibuscunque indebite molestari seu eis dampna vel iniurias irrogari etc. Dat. Avinione, VIII kal. martii, anno duodecimo.