Général
-
Jean XXII (1316-1334)
-
Indulget eidem ministro generali, ut vicariis per ipsum in certis locis et insulis, ubi provinciales ministri non existunt, deputatis, ac si essent ministri provinciales, concedat facultatem promovendi fratres idoneos ad visitationis, praedicationis, confessionis officia.1
-
1326, aprilis 30, Avinione.
-
1326
-
Dilecto filio ‥ ministro generali ordinis fratrum Minorum.
Pium reputantes et congruum, ut pro fratrum tui ordinis laboribus et periculosis discursibus evitandis, et ut animarum salus in hiis, quae suppliciter postulas, possit provenire facilius, petitionibus tuis, quantum cum Deo possumus, favorabiliter annuamus. Cum itaque in nonnullis locis, insulis et provinciis, in quibus fratres tui ordinis degunt nec ministri praeficiuntur eisdem, ad quae et quas absque gravi ordinis tui dispendio non posses personaliter te conferre, per ministros generales dicti ordinis, qui fuerint pro tempore, fratres idonei tui ordinis, in sacra pagina eruditi, vicarii fuerint ordinati et per te etiam ordinentur, qui in vicariis sibi commissis, utpote in tuae sollicitudinis partem assumpti, nonnulla in eis exercent, super quibus ad te absque multarum animarum periculo recurri faciliter non valeret: nos pro spirituali dictarum animarum profectu, tuis supplicationibus inclinati, quod dicti vicarii per te praesentialiter instituti et instituendi in posterum in quibuslibet vicariis ordinis supradicti, etiam si praedictas vicarias contingeret ampliari, possint fratres subditos ratione huiusmodi vicariatus officii eis commissi ad praedicationis et confessionis officia de ipsarum vicariarum aliquorum discretorum fratrum consilio promovere, tenore praesentium de speciali gratia plenam concedimus facultatem: proviso, quod dicti vicarii seu custodes in provinciis, locis et insulis supradictis, in quibus sunt vicariae huiusmodi constitutae, si in eis episcopi catholici fuerint ordinati, in adeundo eorum praesentiam et petendo ab eis licentiam pro idoneis fratribus dicti ordinis ad exercendum in eis confessionis officium eligendis et electis praesentandis eisdem constitutionem dudum super hoc editam a fel. record. Bonifatio papa VIII praedecessore nostro et in Viennensi concilio innovatama inviolabiliter studeant observare. Per hoc autem non intendimus privilegiis concessis fratribus eiusdem ordinis in terris infidelium commorantibus in aliquo derogare. Datum Avinione, II kal. maii, anno decimo.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°607., p.300
-
Reg. Vat. t. 81, f. 177, ep. 1990.
1 -
(a) Cfr. supra n. 196 a.