« bullarium-franciscanum-3795 »

Dilecto filio Petroa electo Maceraten.

Regimini universalis ecclesiae etc. Olim siquidem Maceraten.b ecclesia (pro eo quod nos venerabilem fratrem nostrum Fridericum Senogallien. tunc Maceraten. episcopum, licet absentem, a vinculo, quo tenebatur eidem Maceraten. ecclesiae, cui praeerat, de fratrum nostrorum consilio et apostolicae potestatis plenitudine absolventes, ad Senogallien. ecclesiam tunc vacantem duximus transferendum, praeficiendo ipsum eidem Senogallien. ecclesiae in episcopum et pastorem) regimine destituta pastoris, nos ad celerem provisionem eiusdem Maceraten. ecclesiae, ne prolixae vacationis exponeretur incommodis, sollicite intendentes, cum nullus praeter nos hac vice de ipsius Maceraten. ecclesiae ordinatione se intromittere possit etc., post deliberationem, quam ad deputandum eidem Maceraten. ecclesiae personam utilem ac etiam fructuosam, cuius industria probitatis in suis valeret iuribus adaugeri ac etiam defensari, cum dictis fratribus habuimus diligentem, demum ad te ordinem fratrum Minorum professum, in sacerdotio constitum, cui de religionis zelo, vitae munditia, litterarum scientia, gravitate morum, circumspectionis expertae prudentia et aliis virtutum meritis fide digna testimonia suffragantur, direximus aciem mentis nostrae. Quibus omnibus diligenti meditatione discussis, volentes praefatae Maceraten. ecclesiae salubriter providere, de persona tua, nobis et eisdem fratribus ob huiusmodi tuorum exigentiam meritorum accepta, praefatae Maceraten. ecclesiae de ipsorum fratrum consilio auctoritate apostolica providemus, teque illi in episcopum praeficimus et pastorem, memoratam Maceraten. ecclesiam tibi tam in spiritualibus, quam in temporalibus plenarie committendo etc. Dat. Avinione, VIII idus iunii, anno septimo.c