Général
-
Jean XXII (1316-1334)
-
Gaucerando de Angularia ord. Min. concedit facultatem se transferendi ad ordinem canonicorum s. Augustini.1
-
1323, martii 21, Avinione.
-
1323
-
Dilecto filio Gaucerando de Angularia ordinis fratrum Minorum professori.
Oblatae nobis tuae petitionis series continebat, quod olim de fratrum ordine Minorum, quem professus extiteras, ex quibusdam perturbationibus et divisionibus dicti ordinis conturbatus, ut asseris, recedens, ipsius ordinis regularem habitum dimisisti nec in dicto ordine resumendo dictum habitum tute posses cum fratribus ipsius de cetero conversari, quare nobis humiliter supplicasti, ut animae tuae saluti consulere dignaremur. Nos itaque tuis supplicationibus inclinati, quod ad ordinem sancti Augustini valeas te transferre et in ecclesia vel monasterio seu prioratu aliquo dicti ordinis canonicorum regularium habitum sumere et dictum ordinem profiteri (quibuscunque constitutionibus a praedecessoribus nostris Romanis pontificibus editis nec non privilegiis et indulgentiis apostolicis eidem ordini fratrum Minorum concessis et quibuslibet statuto et consuetudine dicti ordinis Minorum contrariis, confirmatione apostolica vel quacunque alia firmitate vallatis, nequaquam obstantibus), liberam tibi concedimus auctoritate apostolica facultatem. Nulli ergo etc. Datum Avinione, XII kalendas aprilis, anno septimo.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°491., pp.-249
-
Reg. Vat. t. 74, f. 347, ep. 986.
1