Général
-
Jean XXII (1316-1334)
-
Nicolao episcopo Anconitano et fratri Laurentio de Mondaino ord. Min. mandat, ut procedant contra quosdam cives Racanaten. et Auximan. ac Fredericum de Monteferetro.1
-
1320, augusti 28, Avinione.
-
1320
-
Venerabili fratri Nicolaoa episcopo Anconitano et dilecto filio fratri Laurentio de Mondainob ordinis Minorum.
Coelestis agricolae mira benignitas etc. Nuper siquidem ad nostri apostolatus auditum relatio fidedigna perduxit, quod, cum olim publicae famae immo infamiae potius et notoriae insinuationis assertione clamante, quod nonnulli Racanatenses et Auximani cives Marchiae Anconitanae provinciae ad nos et Romanam ecclesiam pertinentes haeresum diversarum erroribus et horribilis idololatriae, quod dolentes reperimus, abhominatione [se] foedabant, tu frater Laurenti (tunc in memorata provincia, infra quam Racanatensis et Auximana civitates fore noscuntur, auctoritate apostolica pravitatis inquisitor eiusdem) contra eos, prout tibi ex officii tui debito incumbebat, inquirens iam usque ad publicationem attestationum in eiusdem inquisitionis negotio receptorum testium processisses, frater Thodinus minister provincialis eiusdem ordinis Minorum in provincia supradicta te ab eiusdem inquisitionis officio, prout sibi competere praetextu cuiusdam ipsius ordinis statuti dicebat, revocasse dinoscitur, tibi fratre Iacobo de Fabriano eiusdem ordinis subrogato. Cum igitur tu, praedicte frater Laurenti, inquisitionis praefatae circumstantias universas plene palpaveris et de omnibus contingentibus inquisitionem eandem informationem habeas pleniorem, nec frater Iacobus subrogatus praedictus posset de facili in eodem negotio informari, sicque negotium ipsum moram, quae dispendiosa ipsi negotio afferret pericula, posset recipere longiorem: nos periculis ipsis, prout debitum exigit apostolicae servitutis, occurrere sollicitis studiis intendentes, discretioni vestrae per apostolica scripta committimus et mandamus, quatenus vos vel alter vestrum, praedictis revocatione ac subrogatione nequaquam obstantibus, negotium inquisitionis eiusdem in eo statu, in quo erat dictae revocationis aut subrogationis tempore, resumentes contra dictos cives ac « credentes », fautores, defensores et receptatores eorum iuxta formam canonum et auctoritatem fratribus tui ordinis, praedicte frater Laurenti, inquisitoribus pravitatis eiusdem deputatis eadem auctoritate apostolica concessam et alias ad sententiam ferendam in ipsius inquisitionis negotio et eiusdem executionem sententiae cum omni diligentia procedatis; volumus autem, quod vos et quilibet vestrum omnibus privilegiis, indulgentiis et litteris apostolicis inquisitoribus haereticae pravitatis sub quibusvis modo, forma vel expressione verborum concessis in negotio inquisitionis huiusmodi uti plene et libere valeatis omnemque potestatem et iurisdictionem per litteras et privilegia supradicta praefatis concessas inquisitoribus exercere. Datum Avinione, V kalendas septembris, anno quarto.
Eisdem.
Coelestis agricolae etc. ut supra usque inquisitor eiusdem, cum sollicite, prout tibi ex officii tui debito incumbebat, procederes contra eos, reperisti per inquisitionem eandem Fredericum de Monteferetroc in diversis articulis de huiusmodi haeresum labe et idololatriae foeditate suspectum, et demum, cum iam .... processisses, fr. Thodinus etc. ut supra usque resumentes, contra memoratum Fredericum super dictis articulis iuxta formam canonum etc. Datum ut supra.d
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°405., p.189
-
Reg. Vat. t. 70, f. 44, ep. 136 de curia.
1 -
(a) Cognom. « de Hungaris », qui ordinis Min. fuisse dicitur.
-
(b) Cfr. infra n. 460.
-
(c) Cfr. infra nn. 455 a et 461.
-
(d) Eisdem episcopo et inquisitori die 11 sept. 1320, ut in negotio, de quo supra, procedant, mandatur (Reg. Vat. t. 71, ep. 3 cfr. 77 de curia).