« bullarium-franciscanum-3588 »

Venerabili fratri ‥ episcopo et dilectis filiis ‥ archidiacono ac Berengario Dominici canonico Elnen.

Cum, sicut accepimus, dilecta in Christo filia Agnes Malsinta alias dicta Cathalana, monialis monasterii monialium Nigropontensis ordinis sanctae Clarae, ad monasterium monialium de Perpiniano dicti ordinis Elnensis dioecesis, sicut asserit, sperans in eo posse magis animae suae proficere ac Altissimo vota quietius reddere, cupiat se transferre: nos eiusdem Agnetis ac venerabilis fratris nostri Hieronymi episcopi Caphensis, pro ea germana sua nobis super hoc humiliter supplicantis, precibus inclinati ac desideriis suis in hac parte annuere intendentes, discretioni vestrae per apostolica scripta mandamus, quatenus vos vel duo aut unus vestrum per vos vel alium seu alios ex nunc auctoritate nostra praedictam Agnetem in dicto monasterio de Perpiniano, ad quod eam transferri volumus, recipi faciatis in monacham et sororem, et sincera in Domino caritate tractari (non obstantibus de certo monialium numero et aliis quibuscumque statutis et consuetudinibus contrariis praedicti monasterii de Perpiniano, iuramento, confirmatione apostolica seu quacumque firmitate alia vallatis, aut si dilectis in Christo filiabus ‥ abbatissae et conventui dicti monasterii de Perpiniano a sede apostolica sit indultum, quod ad receptionem alicuius minime teneantur et ad id compelli seu interdici vel excommunicari non possint per litteras apostolicas etc.): contradictores per censuram ecclesiasticam appellatione postposita compescendo. Datum Avinione, VIII idus februarii, anno secundo.