« bullarium-franciscanum-3499 »

Dilectis filiis ‥ ministro provinciali et fratribus ordinis Minorum provinciae Montis sancti Angeli.a

Sacrae religionis vestrae merita nos inducunt, ut ad vestri propagationem ordinis promptis affectibus intendamus. Cum itaque, sicut exhibita nobis super hoc ex parte carissimi in Christo filii nostri Roberti regis Siciliae illustris petitio continebat, tam vos quam idem rex nec non et incolae civitatis Alarin. et castri Limosan. Benevent. dioec. in regno Siciliae et provincia vestra Montis sancti Angeli consistentium (iidem videlicet incolae pro animarum suarum salute, cum in eisdem civitate et castro aliqui religiosi, per quos huiusmodi eorum saluti, ut cupiunt, provideri valeat, non existant) plurimum affectetis, ut in civitate et castro praedictis loca fratrum eiusdem ordinis ad laudem divini nominis habeantur: nos praedictorum intuitu meritorum ac ipsius regis piae supplicationis obtentu, volentes vos et dictum ordinem favore prosequi gratioso, recipiendi in civitate unum et in castro praedictis alium loca apta et eidem religioni vestrae convenientia, si alias vobis legitime concedantur, idque dilecto filio ‥ generali ordinis praedicti ministro videatur expediens (constitutione fel. record. Bonifatii papae VIIIb non obstante), liberam vobis licentiam auctoritate praesentium elargimur. Datum in prioratu de Grausello Vasionen. dioecesis, nonis iulii, pontificatus nostri anno octavo.