Général
-
Clément V (1305-1314)
-
Concedit ministro generali ceterisque fratribus ord. Min. facultatem recipiendi locum ad ipsorum usum fundandum in villa Laberhani.1
-
1309, maii 25, Avinione.
-
1309
-
Dilectis filiis ‥ ministro generali et fratribus ordinis Minorum.
Religionis vestrae merita nec non dilecti filii nobilis viri Bernardi comitis Astariacia devota supplicatio nos inducunt, ut ad vestri propagationem ordinis promptis intendamus affectibus ac eiusdem comitis piis desideriis favorabiliter annuamus. Cum itaque idem comes, sicut in nostra proposuit praesentia constitutus, pie desideret, ut in comitatu suo Astariacensi, in villa videlicet vocata Laberhanum, locus fratrum eiusdem ordinis ad laudem divini nominis habeatur, nos praedictorum intuitu meritorum ac eiusdem comitis piae supplicationis obtentu, volentes vos et ordinem ipsum favore prosequi gratioso, recipiendi in dicta villa locum dicto ordini congruum, si alias vobis legitime concedatur,b ac iuxta morem dicti ordinis construendi in eodem loco ecclesiam et necessarias officinas ac habendi hortum et coemeterium iuxta illum, in quo conventus eorumdem fratrum perpetuo Domino famuletur, sine iuris praeiudicio alieni (constitutione fel. record. Bonifatii papae VIII praedecessoris nostri, qua prohibetur, ne fratres ipsi ad alia loca se transferant seu illa de novo recipiant sine apostolicae sedis licentia speciali, et qualibet alia super hoc in contrarium editae non obstante) auctoritate vobis praesentium indulgemus. Nulli ergo etc. Datum Avinione, VIIIc kalendas iunii, pontificatus nostri anno quarto.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°130., p.56
-
Reg. Vat. t. 56, f. 133, ep. 651 (n. 4391).
1 -
(a) In Guasconia inter comitatus Bigorrae et Convenarum, cuius caput erat Miranda, ubi fratribus Minor. die 19 maii 1317 a Ioanne XXII recipiendi domum (pertinentem ad custodiam Auxitan. provinciae Aquitaniae) conceditur facultas.
-
(b) Quod nequaquam factum esse videtur; nam in « provinciali » fratrum Minorum circa a. 1340 confecto talis domus non recensetur. Loco eius domus Mirandae (cfr. not. praeced.) fundata esse videtur.
-
(c) Non « VII », sicut legitur apud Wadd. l. c. reg. pont. Clem. V n. 22.