« bullarium-franciscanum-3392 »

Magnifico viro Urosio regi Rassiae illustri gratiam in praesenti, quae perducat ad gloriam in futuro.

Benedictus Deus et pater domini nostri Ihesu Christi, pater misericordiarum et Deus totius consolationis, qui consolatur nos in omni tribulatione nostra, qui, ubi vult, spirans sic novissime his diebus oculos tuae mentis aperuit radio novae lucis, ut, excussa inde tenebrarum caligine, in votis habeas sacrosanctae Romanae ecclesiae, matri fidelium et magistrae, in fidei veritate ac unitate coniungi. Multum quippe teneris Deo, princeps carissime, qui sic te oculo suae pietatis respiciens ad cognitionem et claritatem verae fidei clementer adducit, ex quo magnitudo tua promovebitur ad salutem et solium tuum stabili vallabitur firmitate; multum etiam laetari debet mater ecclesia, et nos profecto multiplici alacritate perfundimur, quod diebus nostris tam nobilis ovis tantusque populus ad ovile reducantur dominicum et schismate aliisque pulsis erroribus Christi corporis, quod ecclesia est, membrum efficiantur, in eo luceant, perficiantur et vivant.

Sane, serenissime princeps, tu pridem Spiritus sancti gratia illustratus viros providos et discretos: Marcum Lucani et Tryphonem Michaelis, magnificentiae tuae nuncios, cum litteris regiis ad nostram praesentiam destinasti, qui huiusmodi tui propositi laudabile desiderium coram nobis et fratribus nostris prudenter et fideliter exponentes a nobis inter alia suppliciter postularunt, ut te tamquam devotum filium ad gremium dictae ecclesiae et sub protectione ipsius benigne recipere dignaremur, tibique aliquos viros idoneos apostolicae sedis nuncios mitteremus, per quos tu et illi de regno tuo in fide catholica et in via mandatorum Domini possitis salubriter informari. Unde nos, qui Christi vicarius et Petri apostolorum principis effecti (disponente Domino, licet immeriti) successores, ad ea praecipue nostrae curae prorogamus affectum ac diligenti studio et studiosa diligentia sedulo vigilamus, ut errantes ad viam veritatis adducere omnesque lucrifacere, Deo sua nobis gratia suffragante, possimus: habita super his, quae iidem tui postularunt nuntii, cum praedictis fratribus nostris discussione solemni, de ipsorum consilio pie decrevimus, huiusmodi votis tuis libenter annuere ipsasque petitiones tuas, quantum cum Deo possumus, favorabiliter exaudire, si, quod ore profers, corde credis, et quod corde credis, opere compleas evidenter; tibi nihilominus tenore praesentium declarantes, quid tibi ac ceteris sub tua ditione degentibus faciendum incumbit, ut ad sinum eiusdem ecclesiae sano fretus consilio venias reverenter. Quae, si inspirante Domino feceris, ecclesia ipsa mater piissima, filio redeunti sinum largissimae pietatis aperiens, in tuos laeta properabit amplexus. Fides autem catholica, quam te, clerum et populum regni tui profiteri et a nobis recipi ac acceptari volumus, haec est etc.

Ecce venerabilem fratrem nostrum Aegidiuma patriarcham Graden. et dilectos filios fratres Lapumb Praedicatorum et Artinisiumc Minorum fratrum ordinum procuratores in Romana curia generales, latores praesentium, viros utique vita et religione conspicuos, honestate decoros, sacrae scripturae scientia praeditos ac nobis et dictis fratribus nostris acceptos, pro his exequendis ad tuam magnificentiam tamquam salutis et pacis angelos iuxta tuae petitionis instantiam destinamus, quorum salutaribus eruditionibus, favente illo, in cuius manu regum corda consistunt, ipsum dominum Iesum Christum perfecte cognosces et suum gloriosum nomen catholicae fidei observatione colere non postpones, ac status tuus supra firmam petram ecclesiae apostolicae solidatus spiritualibus et temporalibus proficiet incrementis, tuque demum coronam perennis gloriae consequeris. Rogamus itaque serenitatem regiam, monemus et hortamur attente, per aspersionem pretiosissimi sanguinis Iesu Christi obsecrantes, quatenus de tua tuique populi salute cogitans praefatos nostros nuntios, propter hoc ad tuam excellentiam accedentes, ob reverentiam apostolicae sedis et nostram benigne recipias et honorificentia debita ac condigna pertractes ac sic attente praebeas ipsorum salutaribus monitis aures tuas, ut verba, quae ex parte tua praedicti tui retulerunt nuncii, per exhibitionem operis compleantur, et spes, quam de tua laudabili intentione concepimus, fructus nobis et ipsi ecclesiae afferat concupitos, tuque praeter divinae retributionis praemium nostram et dictae sedis gratiam uberius consequi merearis. Datum Pictavis, kalendis aprilis, pontificatus nostri anno tertio.