« bullarium-franciscanum-3200 »

BONIFACIUS &c.

Dilectis filiis Rogerio, & Lapo, ac ceteris eorum Sociis de Societate Spinorum de Florentia mercatoribus Cameræ nostræ Sal. & Ap. Ben.

Per diversas nostras certi tenoris litteras universis, & singulis Collectoribus deputatis ad colligendam decimam omnium Ecclesiasticorum reddituum, & proventuum per Nos pridem pro oneribus, & necessitatibus Ecclesiæ Romanæ per triennium impositama in Italia, excepto Regno Siciliæ, ac in Aquen. Arelaten. Viennen. Tarantasien. Bisuntinen. & Ebredunen. Civitatibus, & Diœcesibus, atque Provinciis, & in ea parte Lugdunen. Provinciæ, quæ est citra Rodanum extra Regnum Franciæ constituta, dedimus diversis temporibus in mandatis, ut totam pecuniam per ipsos, vel alios de mandato eorum pro primo, & secundo anno solutionis ipsius decimæ, tam tunc collectam, quàm pro eisdem primo, & secundo anno, ac etiam pro futuro tertio anno solutionis ejusdem decimæ colligendam ex decima supradicta, vobis, aut vestrum alicui, vel aliquibus, seu Procuratori, vel Procuratoribus vestris ad hoc a vobis specialiter constitutis, prædictas nostras inde confectas litteras deferentibus nomine nostro, & ipsius Ecclesiæ assignarent, & facerent assignari, per vos Nobis in Romana Curia ad nostrum beneplacitum persolvendam. Cumque vos dudum post ipsius impositionem decimæ, carissimo in Christo filio nostro Carolob Regi Siciliæ illustri, pro imminenti negotio ipsius Regni Siciliæ, ad cujus promotionem votis ferventibus, & intentis studiis aspiramus, triginta unum millia, & ducentos quadraginta octo florenos auri, & quatuor Turonen. grossos de argento in una manu, & postmodum alia quindecim millia florenorum auri in alia manu, & deinde alia triginta millia florenorum auri in alia manu de mandato nostro noscamini de vestra pecunia persolvisse: Nos vobis pro singulis hujusmodi pecuniarum summis per vos taliter persolutis rehabendis a Nobis, & Ecclesia Romana certas cautelas super pecunia dictæ decimæ primi, & secundi anni dumtaxat pro securitate vestra per tres alias nostras litteras duximus faciendas, sicut in ipsis tribus litteris pleniùs continetur. Cum autem de mandato sitis ultra prædictas summas eidem Regi, vel Venerabili Fratri nostroc ... Episcopo Ravellen. & dilecto filio Fratri Guillelmo de Curiad Ordinis Fratrum Minorum Nuntiis dicti Regis, vel eorum alteri pro ipso Rege decem, & octo millia librarum Turonen. parvorum, quæ pro quatuor millibus unciarum auri sibi juxta computum super hoc jam habitum volumus computari, de vestra pecunia, nostro, & Cameræ nostræ nomine, apud Civitatem Nemausen.e usque ad exitum mensis Martii futuri proxime pro præfato negotio soluturi, Nos volentes indemnitati vestræ super iis omnibus paterna sollicitudine præcavere, præsentium vobis auctoritate concedimus, quatenus pro satisfactione, seu restitutione facienda vobis per Nos & dictam Ecclesiam, de omnibus prædictis pecuniarum summis per vos dicto Regi, ut præmittitur jam solutis, & quam Nemausi, ut supradicitur ipsi Regi, vel dictis Episcopo, & Fratri Guillelmo ejus Nuntiis, vel eorum alteri persolvetis, possitis vobis, de hujusmodi pecunia prædictæ decimæ trium annorum, quam ex hujusmodi assignatione tam facta, quàm facienda vobis, seu Procuratoribus vestris per Collectores eosdem ad manus vestras, vel Procuratorum eorumdem pervenire contigerit, omnes prædictas jam solutas dicto Regi, & solvendas Nemausi sibi, vel præfatis ejus Nuntiis, seu alteri eorum per vos, ut præmissum est, pecuniarum summas, libere, ac licite retinere, nec ad restitutionem aliam faciendam de ipsis, quas sic retinueritis aliquatenus teneamini, neque ad id a quoquam compelli, vel coarctari quomodolibet valeatis. Ne autem inter præsentes, & prædictas alias tres cautelarum nostras litteras inculcatio, vel modus ambiguitatis emergat, volumus, ut eædem aliæ tres litteræ nostræ ad præsentium effectum, & computum reducantur, & intelligantur esse reductæ. Datum Laterani X. Kalendas Martii, Pontificatus nostri Anno Sexto.