« bullarium-franciscanum-3194 »

BONIFACIUS &c.

Venerabili Fratri Ranutioa Archiepiscopo Calaritan.b Salutem, & Apostolicam Benedictionem.

Sedula Nos cura sollicitat, excitatque propensiùs mentem nostram, ut circa statum Ecclesiarum vacantium attentæ considerationis intuitum dirigentes operosæ sollicitudinis studium impendamus, ut vitatis dispendiis, quæ solent illis ex diutinæ vacationis instantia imminere, ipsis personas præficiamus idoneas, viros providos deputemus, per quorum circumspectam prudentiam, & solertiam diligentem spiritualibus, & temporalibus, Domino favente proficiant incrementis. Dudum siquidem Calaritan. Ecclesiâ per obitum bonæ memoriæ Jacobic Calaritan. Archiepiscopi Pastoris solatio destitutâ, ejusque corpore tradito Ecclesiasticæ sepulturæ, dilecti filii ... Archipresbyter, & Capitulum ejusdem Ecclesiæ certa die ad eligendum præfixa, vocatis omnibus, qui voluerunt, debuerunt, & potuerunt commode interesse, insimul convenire curarunt, & tandem, prout moris esse dinoscitur, Spiritus Sancti gratiâ invocatâ, nonnullis ab eis super hujusmodi electionis negotio tractatibus habitis, qui non habuerunt effectum, deliberantes in negotio ipso per viam procedere compromissi, dilectis filiis Francisco Luppini, & Bandino, ac Symoni Cencii Ecclesiæ prædictæ Canonicis eligendi, seu postulandi ea vice aliquem de se ipsis, vel ipsius Ecclesiæ gremio, aut etiam aliunde in ejusdem Ecclesiæ Archiepiscopum potestatem plenariam unanimiter, & concorditer concesserunt, promittentes, quòd illum in suum, & ejusdem Ecclesiæ Archiepiscopum reciperent, & haberent, quem dicti Compromissarii de se ipsis, aut aliis de dicto Capitulo, vel etiam aliunde eligerent, seu etiam postularent. Memorati verò Compromissarii, recepta hujusmodi potestate, secedentes in partem, tractatu super hoc inter se præhabito diligenti, demum in dilectum filium Fratrem Bettum de Pisis Ordinis Minorum vota sua unanimiter direxerunt, ipsum in ejusdem Ecclesiæ Archiepiscopum postulantes, dictique Capitulum postulationem hujusmodi inter eos ab eisdem Compromissariis solemniter publicatam concorditer approbarunt. Cumque postmodum postulatio eadem nostro fuisset Apostolatui præsentata, Nos eam propter ætatis defectum non modicum, quem dictus Frater Bettus adhuc substinere dinoscitur, suadente justitia non duximus admittendam. Et considerantes attentiùs, quàm sit onusta dispendiis, quàm plena periculis, quantaque incommoda secum trahat Ecclesiarum vacatio diuturna, ac volentes propterea ejusdem Calaritan. Ecclesiæ de Apostolicæ sollicitudinis studio indemnibus præcavere, provisionem ipsius Ecclesiæ dispositioni, & ordinationi Apostolicæ Sedis, & nostræ ea vice auctoritate Apostolica duximus reservandam, decernentes ex tunc irritum, & inane, si quid contra hujusmodi reservationem nostram scienter, vel ignoranter contingeret attentari. Levantes igitur in circuitu oculos mentis nostræ, & ad personam tuam litterarum utique scientiâ præditam, Religione conspicuam, morum honestate præclaram, & aliarum virtutum titulis insignitam nostræ considerationis intuitum dirigentes, & intendentes ipsam condignis favoribus, & gratiis honorare, te de Fratrum nostrorum consilio, & Apostolicæ plenitudine potestatis eidem Calaritan. Ecclesiæ in Archiepiscopum præfecimus, & Pastorem, curam & administrationem ipsius tibi in spiritualibus & temporalibus committentes, ac facientes tibi subsequenter per Venerabilem Fratrem nostrum J.d Tusculan. Episcopum munus consecrationis impendi, firmâ conceptâ fiduciâ, quòd dirigente Domino actus tuos, prædicta Calaritan. Ecclesia per tuam circumspectionem providam, & providentiam circumspectam laudabiliter & prospere dirigetur, ac salubria, grataque illi provenient incrementa. Suscipe igitur jugum Domini reverenter, ac suavi ejus oneri humiliter colla submitte, sicque ipsius Ecclesiæ curam, & administrationem diligenter exerceas, & sollicite prosequaris, gregem Dominicum in ea vigilantiæ tuæ commissum doctrinâ verbi & operis informando, quòd præfata Ecclesia, cooperante tuæ diligentiæ studio, multiplicibus lætari commodis, & favente clementia summi Regis optatis consurgere valeat incrementis. Datum Laterani VI. Idus Novembris, Pontificatus nostri Anno Quinto.