Général
-
Boniface VIII (1294-1303)
-
In Hungariæ Regno Inquisitionis munus ope FF. Ord. Præd. & Min. instituere, ac exercere valeat. ex Reg. Vat. epist. 38. anni 5.
-
Anno 1299. die 28. Januarii.
-
1299
-
BONIFACIUS &c.
Dilecto filio Gregorio Electo Strigonien.a Salutem, & Apostolicam Bened.
Utilitate publica exposcente, ac necessitate urgente, te qui in Alben.b Præpositum primò, & postmodum in Strigonien. Archiepiscopum electus fueras, ex diversis considerationibus Procuratorem Strigonien. Ecclesiæ ordinandum duximus usque ad Sedis Apostolicæ beneplacitum, earumdem Strigonien. & Alben. Ecclesiarum generali, & libera tibi in spiritualibus, & temporalibus administratione commissa, prout hæc pleniùs in aliis nostris commissionis hujusmodi litteris continentur. Et ut Regnum Ungariæ in prospero, & bono statu atque pacifico conservetur, vigeat catholica fides in eo, pestis hæresis, scismatis, & pagani eradicentur in ipso, ut contra hæreticos, scismaticos, & Paganos, fautores, adjutores, receptatores, & defensores ipsorum per Fratres Prædicatorum, seu Min. Ord. quos ... Magister, & Minister generalis eorumdem Ordinum, aut ... Prior, & ‥ Minister Provincialis Ungariæ ipsorum Ordinum, aut eorum aliqui, vel aliquis de consilio discretorum Fratrum suorum Ordinum tibi duxerint nominandos, inquisitionis, & punitionis officium valeas exercere secundùm Sanctiones canonicas, & legales per Sedem Apostolicam approbatas eandem, ac contra turbantes tranquillum statum in dicto Regno etiam impedientes prædicta, aut aliquid eorumdem per te, vel alium, seu alios spiritualiter, & temporaliter procedendi, necnon contra ejusdem Ecclesiæ Romanæ rebelles, & turbatores pacis dicti Regni; convocandi etiam Archiepiscopos, Episcopos, Abbates, & alios Ecclesiarum Prælatos, & Capitula, seu Conventus Sæcularium, vel Regularium Ecclesiarum exemptarum, & non exemptarum, & personas aliàs Ecclesiasticas, & mundanas ejusdem Regni cujuscumque fuerint eminentiæ, ordinis, conditionis, & status pro exequendis prædictis, & procedendi contra impedientes eos, qui pro iis ad convocationem tuam venire voluerint, elargiendi quoque vere pœnitentibus, & confessis, qui ad hujusmodi convocationem prædictorum, prætextu convenerint, indulgentiam unius anni, & quadraginta dierum liberam tibi concedimus auctoritate præsentium facultatem. Datum Laterani V. Kal. Februarii, Pontificatus nostri Anno Quinto.
-
Bullarium Franciscanum romanorum pontificum, tomus IV, n°CLXI., p.482
-
(a) Strigonien.: Incolis Stegran, Gran verò Germanis. Urbs est Archiepiscopalis Hungariæ, & primaria Comitatus sui nominis. Sedet ad dexteram Danubii partem inter Jaurinum, & Budam, & dividitur in duas communiter, superiorem nempe, cujus situs ad montis radices, & inferiorem, quæ supra Danubium manet. Occupata fuit a Turcis an. 1543. sed sub Rodulpho II. Imperatore ab Alemannis recuperata, non post multum temporis iterum ad Turcas devenit, sub quorum immanitate detenta fuit ad annum usque 1683. quo tempore denuo ad Imperiales devenit.
-
(b) Alben.: nempa Regalis 10. milliar. Germanicis a Strigonio procul. Vide supra pag. 53. nota (i).