Général
-
Boniface VIII (1294-1303)
-
Poscenti concedit, ut cum duobus O. Min. Fratribus, & nonnullis Matronis quæcumque Clarissarum Monasteria ingredi queat. ex Reg. Vat. Pontif. ep. 345. an. 2. ex Petro de Alva n. 29. & Meliss. in suppl. ad Vadd. ad hunc annum n. 3.
-
Anno 1296. die 16. Junii.
-
1296
-
BONIFACIUS &c.
Dilectæ in Christo filiæ nobili mulieri Blanchæa natæ claræ memoriæ Philippib Regis Francorum Salutem, & Apostolicam Benedictionem.
Devotionis tuæ meretur honestas, ut quæ digne postulas, libenter ad exauditionis gratiam admittamus. Cum itaque, sicut ex tenore tuæ petitionis accepimus, tu ad Ordinem Sanctæ Claræ specialem geras devotionis affectum, Nos tuis supplicationibus benignum impartientes assensum, auctoritate tibi præsentium indulgemus, ut Monasteria ejusdem Ordinis ubicumque existentia duobus Fratribus Ordinis Minorum, si eos ducere tecum volueris, & sex, vel octo ad plus, honestis associata matronis in decenti habitu causâ devotionis ingredi libere valeas, dummodo ad id Abbatissarum eorumdem Monasteriorum accedat assensus, tuque, Matronæ, ac Fratres prædicti in ipsis Monasteriis non edatis, nec etiam pernoctetis, constitutione aliqua ipsius Ordinis non obstante. Nulli ergo omnino hominum liceat hanc paginam nostræ concessionis infringere, vel ei ausu temerario contraire. Si quis autem &c. Datum Anagniæ XVI. Kalendas Julii, Pontificatus nostri Anno II.
-
Bullarium Franciscanum romanorum pontificum, tomus IV, n°LXXII., pp.397-398
-
(a) Blanchæ: quæ anno 1300. nupsit Rodulpho III. Austriæ Duci, & deinceps anno 1307. Bohemorum Regi salutato. Genealog. Historiq. des Maisons Souveraines.
-
(b) Claræ memoriæ Philippi: Hujus nominis III. cognomento Audacis, orti die 1. Maii anno 1245. qui cum a die 15. Augusti 1271. Regni coronâ redimitus, Regnum ipsum gubernare cœpisset, anno demum 1285. dum contra Petrum III. Aragoniæ Regem præliaretur, Perpiniani, peste correptus, vitam absolvit. Bardi in Chronol. Univers. & Genealog. Historiq. des Maisons Souveraines.