Général
-
Boniface VIII (1294-1303)
-
Monasterium S. Danielis Gerunden. Diœc. O. S. B. de idonea provideant Abbatissa. ex Reg. Vatic. epist. 304. anni 2.
-
Anno 1296. die 27. Aprilis.
-
1296
-
BONIFACIUS &c.
Venerabili Fratri ‥ Episcopo, & dilectis filiis ‥ Priori Prædicatorum, & ‥ Guardiano Minorum Fratrum Ordinum Gerunden.a Salutem, & Apostolicam Benedictionem.
Ad audientiam nostram, te Fratre Episcopo significante, pervenit, quòd pridem Monasterio Monialium Sancti Danielisb Ordinis Sancti Benedicti Gerunden. Diœcesis Abbatissæ regimine destituto, dilectæ in Christo filiæ Conventus ipsius Monasterii diligentiùs attendentes, quòd Apostolica Sedes terram, quam quondam Petrusc olim Aragonum Rexd tenebat, ubi Monasterium ipsum consistit, & consistebat, Ecclesiastico Interdicto subjiciens, provisiones Ecclesiarum, & Monasteriorum ipsius sibi reservare curavit, ad electionem futuræ Abbatissæ in eodem Monasterio faciendam procedere hactenus omiserunt. Quare Nobis humiliter supplicasti, ut cum eis valde dispendiosum, & laboriosum existat propter nimiam paupertatem, qua ipsum Monasterium prægravatur, & etiam ob viarum discrimina prædictam Sedem adire pro hujusmodi negotio prosequendo, providere super hoc eis, & indemnitati ejusdem Monasterii paterna sollicitudine dignaremur. Nos itaque volentes præfati Conventus in hac parte parcere laboribus, & expensis; & nolentes, quòd Monasterium ipsum diutinæ vacationis dispendia patiatur; gerentes quoque de vestræ probitatis industria fiduciam in Domino specialem, discretioni vestræ per Apostolica scripta mandamus, quatenus ad Monasterium ipsum personaliter accedentes, & Deum habentes præ oculis aliquam personam idoneam de gremio ipsius Monasterii assumendam præficiatis hac vice auctoritate nostra præfato Monasterio in Abbatissam, facientes illi, quam eidem Monasterio præfeceritis, a suis subditis obedientiam, & reverentiam debitam exhiberi, & de suis juribus integre responderi. Contradictores &c. (usque) compescendo. Tu verò, Frater Episcope, munus benedictionis impendas eidem: Non obstante, si vobis, filii Prior, & Guardiane, seu Fratribus vestri Ordinis a præfata sit Sede indultum, ut de causis, seu negotiis, quæ vobis a Sede committuntur eadem vos intromittere minime teneamini absque speciali mandato Sedis ipsius faciente plenam, & expressam, ac de verbo ad verbum de indulto hujusmodi mentionem. Datum Romæ apud S. Petrum V. Kalendas Maii, Pontificatus nostri Anno II.
-
Bullarium Franciscanum romanorum pontificum, tomus IV, n°LXIII., pp.390-391
-
(a) Gerunden.: Gerunda, incolis Girona, urbs Episcopalis Catalauniæ ad amnem Sambrocam sub Archiepiscopo Tarraconensi. De Minorum hac in Civitate Cœnobio in primo hujus Oper. tomo pag. 658. (e), & alibi.
-
(b) S. Danielis: de quo Monialium O. S. B. Monasterio ne verbum quidem apud Mabillonium in Annal.
-
(c) Petrus: hujus nominis III. de quo plurima apud Raynaldum, & Spondanum in Annalibus.
-
(d) Olim Aragonum Rex: quippe qui in bello, quod ipsum inter, ac Philippum III. Francorum Regem intercessit, graviter sauciatus, in Villa-franca occubuit die 8. Novembris anno 1285. Raynaldus, & Spondanus ad annum 1285. hic n. 15. ille verò num. 25.