« bullarium-franciscanum-2997 »

NICOLAUS &c.

Venerabili Fratri Nicolaoa Episcopo Albinganen.b Salutem, & Apostolicam Benedictionem.

Ad Universalis Ecclesiæ regimen divina dispositione vocati circa statum cujuslibet aciem sollicitæ considerationis extendimus, Pastoralis partes officii vigilantiùs adhibentes, ut Ecclesiæ singulæ a Pastoribus gubernentur idoneis, & Rectoribus utilibus disponantur, quatenus illorum circumspectione provida, & providentia circumspecta, operante illo, qui Pastorum Pastor, & Rector agnoscitur, spiritualium, & temporalium proficiant incrementis. Dudum siquidem Albinganen. Ecclesiâ per obitum bonæ memoriæ L.c Albinganen. Episcopi Pastoris solatio destitutâ, duæ in ea, una videlicet de Fratre Robertod Presbytero Ordinis Minorum, alia verò de quondam Benedicto de Nigroe Canonico Tripolitano tunc vivente a Capitulo ipsius Ecclesiæ fuerunt electiones in discordia celebratæ, ac postmodum eodem Fratre hujusmodi electioni suæ recusante præbere consensum, Venerabilis Frater Noster ‥f Patriarcha Antiochenus ex commissione Sedis Apostolicæ speciali gerens curam, & administrationem Ecclesiæ Januen. Ecclesiæ præfatæ Albinganen. Metropolitanæ hujusmodi electionem dicti Canonici auctoritate Metropolitica confirmavit. Postea verò dicto Canonico viam universæ carnis ingresso, prædictum Capitulum alias duas electiones, unam scilicet de Fratre Cherubino Ordinis Prædicatorum, aliam verò de quodam Ottobono Canonico Cathalaunen. tunc vivente in eadem Albinganen. Ecclesia similiter in discordia celebrarunt. Verùm cum dictus Frater Cherubinus noluisset electioni de se factæ præbere consensum; Nos tandem causam, quæ super hujusmodi electione dicti Ottoboni coram eodem Patriarcha nonnullis illi se opponentibus auctoritate tractabatur eadem, ne protraheretur diutiùs in dispendium Albinganen. Ecclesiæ memoratæ, ad examen Sedis revocavimus supradictæ. Cumque postmodum idem Canonicus juri, si quod in hujusmodi electione sibi acquisitum extiterat, in nostris manibus renuntiasset, Nos renunciatione admissa hujusmodi, ad provisionem ejusdem Albinganen. Ecclesiæ salutarem sollicitæ considerationis intuitum dirigentes, tandem donis virtutum, quæ in te congessit Altissimus, Nobis familiari experientia cognitis, attentione sollicita recensitis, in te tunc Fratrem Minorum Ordinis memorati oculos direximus nostræ mentis, & firmâ conceptâ fiduciâ, quòd per tuæ virtutis ministerium eadem Albinganen. Ecclesia in prosperitatem consurget optatam, & brachio consolationis tuæ subnixa in spiritualibus, & temporalibus, auctore Domino, votivis proficiet incrementis, te ipsi Albinganen. Ecclesiæ de Fratrum nostrorum consilio in Episcopum præfecimus, & Pastorem, tibi postmodum de nostris manibus munere consecrationis impenso. Rogamus itaque Fraternitatem tuam, & per Apostolica scripta mandamus, quatenus ad dictam Albinganen. Ecclesiam in humilitate spiritus accedens ipsius curam sic agas sollicite, sic eam prudenter gubernare studeas, sic diligenter oves tibi creditas ab invasoris insultibus custodire, quòd tuis actibus super his apud Deum, & homines dignis laudibus constitutis, ipse bonorum operum retributor unà cum Grege tuæ curæ commisso supernorum civium constituat te collegam. Datum Romæ apud Sanctam Mariam Majorem quinto Kalendas Februarii, Pontificatus nostri Anno Quarto.