Général
-
Nicolas IV (1288-1292)
-
Nuncios Regis Armeniæ magnopere Gallo commendat, & miserum illius Regni statum repræsentat. ex Reg. Vat. ep. 85. apud Vaddingum ad hunc ann. n. 2. Annal. & Raynaldum n. 1. nunc ep. 861. Regesti Vatic.
-
Anno 1292. die 23. Januarii.
-
1292
-
NICOLAUS &c.
Carissimo in Christo filio ‥a Regi Franciæ Illustri Salutem, & Apostolicam Benedictionem.
Pia Mater Ecclesia super filios in manus impiorum datos tenera dilectione deplorans, si quas invenit eorum reliquias non consumptas, illas conservare conatur, & maternæ pietatis auxiliis confovere. Sane Regni Armeniæ statum miserabilemb attendentes, & eidem materno compatientes affectu dilectos filios Fratres Thomam de Tolentino,c ac Marcum de Monte Luponed Ordinis Fratrum Minorum, ac nobilem virum Gaufridum Comitissæ latores præsentium, charissimi in Christo filii nostri Regis Armeniæ Illustris Nuncios tuæ Magnificentiæ in Domino commendamus, rogantes quatenus eosdem ad Celsitudinis vestræ præsentiam accedentes pro divina, & Apostolicæ Sedis reverentia benigne suscipias, & in negotiis præfati Regis, quæ tibi exposuerint, prout Regiam decet mansuetudinem, aurem pietatis adhibeas, & animum Regiæ propitiationis impendas. Datum Romæ apud Sanctam Mariam Majorem X. Kalendas Februarii, Pontificatus nostri Anno Quarto.
-
Bullarium Franciscanum romanorum pontificum, tomus IV, n°CXII [DXCII]., pp.-316
-
(a) Filio: Philippo Pulchro.
-
(b) Statum miserabilem: a Continuatore Hist. Belli sacri, aliisque illorum temporum auctoribus descriptum.
-
(c) Thomam de Tolentino: in Annal. Minor. non semel memoratum, & in Armeniam anno 1290. missum.
-
(d) Marcum de Monte Lupone: Marchiæ Anconitanæ Oppido Firmanæ Diœcesis, qui & ipse cum præfato Fr. Thoma in Armeniam amandatus fuerat ex Annal. Minor.