Général
-
Nicolas IV (1288-1292)
-
Eosdem, eorumque Nuncios, & familiares extra Provinciam pro Inquisitionis officio exeuntes enixe commendat. ex Vatic. Reg. Pontif. epist. 372. n. 2. an. 4.
-
Anno 1291. die 31. Julii.
-
1291
-
NICOLAUS &c.
Venerabilibus Fratribus Archiepiscopis, & Episcopis, ac dilectis filiis universis Nobilibus, Potestatibus, seu Rectoribus, Communitatibus, & Universitatibus, ceterisque Personis Sæcularibus Castrorum, aliorumque locorum per Italiam constitutis, ad quos præsentes litteræ pervenerint, Salutem, & Apostolicam Ben.
Cum dilectos filios Inquisitores hæreticæ pravitatis in administratione Marchiæ Tervisin. auctoritate Sedis Apostolicæ deputatos occasione officii, quod exercent, plerumque extra commissam eis administrationem exire oporteat, & familiares suos, ac Nuntios ad diversas Italiæ partes transmittere pro Hæreticis, seu relapsis ad eorum præsentiam sub fida custodia transducendis, ac nonnullis aliis negotiis pertinentibus ad officium supradictum, Universitatem vestram rogamus, monemus, & hortamur attente per Apostolica vobis scripta præcipiendo mandantes, quatenus super præmissis eisdem Inquisitoribus, vel eorum alteri, ac Nuntiis, & Familiaribus eorumdem ipsorum Inquisitorum patentes deferentibus litteras, cum per partes, & loca vestra transierint, vel moram fecerint in eisdem, pro nostra, & Apostolicæ Sedis reverentia favorabiliter assistentes eis de securo conductu, quoties opportunum extiterit, liberaliter providere curetis; super hoc vos taliter habituri, quòd ex sinceritate devotionis, & fidei possitis meritò commendari. Datum apud Urbem veterem Secundo Kalendas Augusti, Pontificatus nostri Anno Quarto.
-
Bullarium Franciscanum romanorum pontificum, tomus IV, n°DXV., pp.-272