« bullarium-franciscanum-2808 »

NICOLAUS &c.

Venerabili Fratri Joannia Archiepiscopo Jadren.b Sal. & Ap. Ben.

Ad universalis Ecclesiæ regimen divina dispositione vocati circa statum cujuslibet aciem sollicitæ considerationis extendimus, Pastoralis partes Officii vigilantiùs adhibentes, ut Ecclesiæ singulæ a Pastoribus gubernentur idoneis, & Rectoribus utilibus disponantur. Dudum siquidem Jadren. Ecclesia per obitum bonæ memoriæ L.c Jadren. Archiepiscopi Pastoris solatio destituta, Capitulum ipsius Ecclesiæ pro futuri substitutione Pastoris convenerunt in unum, et cum tandem nonnulli ex dictis Capitulo Magistrum Andream Capsoni Canonicum Ecclesiæ Paduan. in Jadren. Archiepiscopum elegissent, reliqui ad venerabilem Fratrem nostrumd ‥ Graden. Patriarchame loci superiorem ab electione hujusmodi appellarunt. Coram quo aliquandiu negotio hujusmodi ventilato, Nos in eo postmodum per appellationem ad Sedem Apostolicam legitime devoluto dilectum filium nostrum Joannemf Tituli Sanctæ Cæciliæ Presbyterum Cardinalem concessimus partibus Auditorem. Verùm postea idem Magister Andreas cupiens suæ providere quieti juri, si quod sibi in electione hujusmodi extiterat acquisitum, in nostris manibus renunciavit expresse. Nos itaque, hujusmodi renunciatione recepta, ad provisionem ipsius Ecclesiæ salutarem debitâ solertiâ consurgentes, ut ipsam avertamus a dispendiis, quæ solent Ecclesiis ex vacatione diutina provenire, in te Ordinis Minorum Fratrum, quem & fide dignorum testimonio laudabili accepimus virtuosum, prædicant fluenta virtutum, ac titulo multæ circumspectionis extollunt, oculos direximus nostræ mentis. Quapropter sperantes in Domino, quòd per ministerium tuæ virtutis in multis expertum, & experientiâ comprobatum, præfata Ecclesia in prosperitate consurget optata, & brachio tuæ consolationis subnixa in spiritualibus, & temporalibus auctore Domino gratis proficiet incrementis, te ipsi Ecclesiæ de Fratrum nostrorum consilio præfecimus in Archiepiscopum, & Pastorem, tuæ prudentiæ curam, & administrationem ipsius temporaliter, & spiritualiter committendo, postmodum tibi de nostris manibus munere consecrationis impenso. Rogamus itaque Fraternitatem tuam, & hortamus in Domino per Apostolica tibi scripta mandantes, quatenus curam, & administrationem ipsius Ecclesiæ tuæ fidelitati commissas, devoteque susceptas, sic prudenter studeas gerere, ipsarumque onus prudentiùs supportare, quòd in grege tibi tradito fructus multiplices illi bono Pastori acceptos, qui dat affluenter, & non improperat, quique actus sibi placitos dirigit in viam salutis æternæ, id sic efficaciter supernis adjutus auxiliis impleturus, quòd proinde unà cum tuis subditis merearis cum dilectis in districto examine in dexteram collocari sempiternæ lætitiæ dulcedine fruiturus. Datum apud Urbem veterem II. Idus Februarii, Pontificatus nostri Anno Tertio.