Général
-
Nicolas IV (1288-1292)
-
Concedit, ut pro jam incœpta constructione Ecclesiæ, aliorumque ædificiorum vendant ante statutum tempus domos, & possessiones eis legatas a Palmeria Mudacii. ex Vat. Reg. Pontif. epist. 336. anni 3.
-
Anno 1290. die 18. Augusti.
-
1290
-
NICOLAUS &c.
Dilectis filiis ‥ Guardiano, & Fratribus Conventus Sanctæ Mariæa de Venetiis Ordinis Minorum Castellan.b Diœcesis Sal. & Ap. Ben.
Exhibita Nobis vestra petitio continebat, quòd quondam Palmeria relicta olim Thomæ Mudacii Laici vidua de Venetiis suum condens testamentum in ultima voluntate inter alia voluit, & statuit in eodem, ut fructus, & proventus domorum, terrarum, & possessionum, quas in contrata Sancti Johannis decollati ad eam spectantes habebat, post mortem suam per quadraginta annos immediate sequentes pro sua, parentum, mariti, & filiorum suorum animarum salute ad vos pro victu, & aliis vestris necessariis libere pervenirent, exceptis quibusdam denariorum parvorumc summis, quas prædictæ Ecclesiæ Sancti Johannis, & quibusdam aliis de ipsis fructibus dare mandavit, quibus est, prout asseritis, integre satisfactum: & voluit insuper, quod ex tunc juxta dispositionem ... Ministri,d & ‥ Custodis Provincialium ejusdem Ordinis ..... Guardiani, & quatuor Fratrum, quos ad hoc elegeritis idoneos, proprietates hujusmodi venderentur, & eorum pretium, prout viderent utiliùs, vestris necessitatibus applicarent. Verùm licèt de dicto tempore decennium sit elapsum, & ultra, tamen cum in construendis Ecclesiâ, & aliis ædificiis vobis necessariis, quæ dudum incœpistis facere construi, magna subieritis, & adhuc subire vos oportet onera expensarum, ad quas supportandas, relinquendo propria Christum imitantes pauperem, nequaquam sufficitis, nisi vobis a Christifidelibus succurratur; ac multùm occurrat vobis accomodum, si proprietates hujusmodi venderentur, Nobis humiliter supplicastis, ut prædicto quinquagenario tempore etiam non decurso, vendendi possessiones easdem licentiam vobis concedere dignaremur. Nos itaque vestris supplicationibus annuentes, & vobis in necessitatibus paterno compatientes affectu, ac nihilominus testatricis ejusdem desideriis providentes, dummodo illis, quibus testatrix eadem de fructibus dictarum possessionum certas dari mandavit pecuniæ quantitates, per vos integre satisfiat, & annis singulis usque ad metam præfiniti temporis in anniversario testatricis ipsius Missam, & Servitium mortuorum pro ejus, parentum, mariti, & filiorum suorum animabus celebrari solemniter faciatis, vobis tenore præsenrium licentiam concedimus postulatam. Nulli ergo omnino hominum liceat hanc paginam nostræ concessionis infringere &c. Datum apud Urbem veterem Decimo quinto Kalendas Septembris, Pontificatus nostri Anno Tertio.
-
Bullarium Franciscanum romanorum pontificum, tomus IV, n°CCXCVIII., p.169
-
(a) S. Mariæ de Venetiis: seu S. Mariæ gloriosæ, nunc vulgò li Frati, de quo Conventu non rarò in præcedentibus tomis.
-
(b) Castellan. Diœc.: quod idem est ac Veneten. Diœcesis, ut notavimus quoque in 3. tomo pag. 228. n. (h); Triplici namque nomine Ecclesia isthæc appellata fuit, videlicet Olivolensis ab olivis in hac Insula olim consitis, ut in Regesto Joann. Papæ VIII. ubi inter alias exstat epistola ad Dominum Episcopum Olivolensem, qui inter suffraganeos Patriarchæ Graden. connumeratur. Postmodum appellata fuit Castellana, & Ecclesia S. Petri in Castello a loci munitione, de qua nomenclatura frequens mentio habetur in Tabulariis Pontificum recentiorum, in libro Fisci Apostolici, ac Provinciali Romano, ubi inter suffraganeos Gradensis Patriarchæ Castellanus quoque Episcopatus recensetur. Postremò dicta fuit Ecclesia Venetiarum ab Episcopi jurisdictione, ac domicilio gentis Venetæ in hac, & vicinis Insulis constituto, erectaque fuit in Patriarchatum, & Primatiam a Nicolao V. anno Domini 1450. Ughell. tom. 5. Italiæ Sac. in descriptione Civitatis Venetiarum.
-
(c) Parvorum: de quorum vario valore fuse Du-Cange ad vocem moneta in suo Glossario.
-
(d) Ministri: Fr. Bartholomæi hoc anno Kalendis Maii in Ministrum electi in Capitulo Tarvisii coacto, ex Auctore Elogii Historici B. Odorici.