« bullarium-franciscanum-2615 »

NICOLAUS &c.

Dilectis filiis nobilibus viris Baronibus, Proceribus, Militibus, & ceteris stipendariis Christianis Marochitani, Tunisiia , & Tremisciib Regum servitio constitutis Sal. & Ap. Benedictionem.

Etsi omnes, qui Christianæ fidei cultum tenent, ut suas Deo lucrifaciant animas, ad recte vivendi regulam dirigi cupiamus, illos tamen, qui in regionibus Infidelium, & cum Infidelibus conversantur, ut fide opere ac veritate perfecti se incontaminatos coram Deo, & hominibus exhibentes, laudabilis vitæ meritis, & exemplis infideles etiam pertrahant ad salutem, potiori desiderio exoptamus omnem in seipsos justitiam, rectitudinem, & modestiam adimplere, ipsosque abstinere ab omnibus, per quæ fidei christianæ Religio possit in populis blasphemari. Sane cum illius, licèt immeriti, vicem gerentes in Terris, qui pro generis humani salute de suæ solio Majestatis a summo Cælo in mediam exterminii nostri Terram exiliens, trabeâ nostræ humanitatis assumptâ, ut temporali morte legem mortis aboleret æternæ, pro nobis dignatus est proprio sanguine fuso mori, & diros Crucis perpeti cruciatus, ad animarum profectum intentionis nostræ aciem totaliter dirigamus; & pro incredulis convertendis, Apostatis revocandis, confirmandis nutantibus, & fidelibus roborandis omni sollicitudine laborantes, quia repugnante natura præsentialiter diversis locis simul adesse non possumus, Venerabilem Fratrem nostrum Rodericum Marochitan. Episcopumc virum utique providum, & discretum ad partes Africæ, commisso sibi plenæ Legationis officio, destinamus. Nobilitatem vestram rogamus, monemus, & hortamur attente, quatenus eundem Legatum, & Nuntios ejus devote recipientes, & honeste tractantes, eis in iis, quæ ad cultum Divini nominis pertinent ampliandum, impendatis consilium, & auxilium opportunum, & verba vitæ æternæ, quæ vobis proponent, cum gaudio audientes, eorumque salubribus consiliis acquiescentes, christianæ professionis propositum firmo servetis animo, & constanti, ut sic inter incredulos vos exhibere vitâ, & conversatione probabiles studeatis, charitate magistra, & pietate præduce in divinis beneplacitis vos jugiter exercendo, ac abstinendo ab omnibus, per quæ detrahi valeat nomini christiano, quòd tam fideles, qui in partibus ipsis degunt, quàm etiam Infideles ad frugem melioris vitæ vestro proficiant, & informentur exemplo, & Nos in vestris laudibus delectabiliter in Domino gloriantes vobis pro vestræ devotionis, & fidei sinceritate reddamur favorabiles, & benigni. Datum Romæ apud S. M. Majorem V. Idus Februarii, Pont. Nostri Anno II.