« bullarium-franciscanum-2494 »

NICOLAUS &c.

Ad certitudinem præsentium, & memoriam futurorum.

Hæc est forma litterarum, de quibus a carissimo in Christo filio nostro Dionysio Portugalliæ, & Algarbii Rege illustri dilectis filiis ‥ Priori Predicatorum, & ‥ Guardiano Minorum Fratrum Ordinum Ulixbonen. vel eorum vicem gerentibus Ecclesiæ Romanæ nomine concedendis fit mentio in aliis nostris litteris, per quas ipsum Regem a sententia excommunicationis, & pœnis, quas non servando ordinationem, sive provisionem fel. record. Gregorii Papæ x. prædecessoris nostri super articulis, de quibus inter Prælatos, & quondam A. Portugalliæ, & Algarbii Genitorem ipsius Regis Dionysii erat controversia, editam, incurrisse dinoscitur, duximus absolvendum. “Nos Dionysius Dei gratia Portugalliæ, & Algarbii Rex notum facimus &c.a. Nosque post hæc a sententia excommunicationis, & pœnis omnibus, quas non servando provisionem, sive ordinationem Domini Gregorii Papæ x. super articulis, de quibus inter Prælatos, & claræ memoriæ A. Regem Portugalliæ, & Algarbii Genitorem nostrum controversia fuerat, editam, noscimur incurrisse, ad magnam instantiam eorumdem Prælatorum, & Procuratorum nostrorum petitionem, qui & quorum uterque insolidum ad petendum absolutionem a dicta sententia mandatum a Nobis habebant, recepto a memorato Cantore in animam nostram de stando mandatis Ecclesiæ juramento, in Consistorio publico ad hoc specialiter congregato, præfato Canonico propter corporis invalitudinem tunc absente, de speciali gratia & consilio Fratrum suorum absolvens, pœnas penitus abolendo prædictas, ordinavit, quòd infra quadrimestre tempus, postquam receperimus litteras ejus super absolutione nostra prædicta, eamdem petitionem absolutionis per eosdem Procuratores, & juramenti præstationem per mem. Cantorem factas, necnon dictam compositionem, ac omnia, & singula, quæ cum Archiepiscopo, & Episcopis memoratis per eosdem Procuratores nostros acta sunt nostro nomine in præmissis, ratificemus acceptemus & approbemus in nostra Curia generali, & præmissis suis confirmationi ordinationi provisioni decreto seu statuto expresse consentiamus, eaque, ac omnia, & singula contenta in eis Nos, dictosque successores nostros plene adimpleturos & perpetuò inviolabiliter servaturos, & Religiosis viris ... Priori Prædicatorum, & ‥ Guardiano Minorum Fratrum Ordinum Ulixbonen. vel eorum vicem gerentibus eorumdem Summi Pontificis, & Ecclesiæ Romanæ nomine stipulantibus promittamus stipulatione solemni, eisque super ratificatione acceptatione approbatione ac promissione hujusmodi patentes nostro Regio sigillo plumbeo pendenti munitas in forma destinata Nobis super hoc ab eadem Sede litteras concedamus. Adjiciensque si dictam suam ordinationem per omnia infra dictum tempus non impleverimus, eo ipso in similem pristinæ, vel eamdem excommunicationis sententiam, quam in eum casum ex tunc in Nos idem Summus Pontifex protulit, incidamus, & ad omnes dictas pœnas perinde teneamur, ac si numquam absoluti fuissemus ab illis, nec ab eodem Summo Pontifice super eis absolutio aliqua processisset. Insuper Cappellam nostram, & loca singula, ad quæ Nos declinare contigerit, quamdiu præsentes in eisdem locis fuerimus, interdicto Ecclesiastico subjacere decrevit, sicut in eisdem Summi Pontificis litteris Nobis super hoc directis seriosiùs continetur. Nos itaque in hac nostra generali Curiâ dictas petitionem absolutionis per eosdem Procuratores nostros, ac juramenti præstationem per memoratum Cantorem factas, necnon præmissam compositionem ac omnia, & singula, quæ cum Archiepiscopo, & Episcopis memoratis per eosdem Procuratores nostros acta sunt &c.b. Datum Romæ apud S. M. Majorem X. Kal. April. Pont. nostri An. Secundo.