Général
-
Nicolas IV (1288-1292)
-
Ordinem FF. Minorum a quorumcumque jurisdictione eximit, & Sedi Apostolicæ subjicit. ex Autographo Archivi Aracæl. n. 20., Speculo Min. trac. 2. fol. 34, & Roder. Bul. 10.; Item ex Autographo Conventus S. Francisci Salmanticen. apud Vaddingum ad hunc ann. n. 12. Regesti Pontificii, & etiam Conventus nostri Avenionen.; at in Vatic. Reges. est epist. 33.: Extat, & Jaderæ apud Observ. ex Gonzaga par. 2. Conv. 12. Prov. Dalmatiæ, & Pragæ in Bohemia apud nostros.
-
Anno 1288. die 30. Aprilis.
-
1288
-
NICOLAUS &c.
Dilectis filiis Generali,a & Provincialibus Ministris, ac universis FF. Ord. Min. Sal. & Ap. Ben.
Quia nonnulli, qui hæsitare se asserunt, ubi non est aliquatenus hæsitandum, dum in malignitatis astutiâ in dubium revocare conantur, utrum vos, & Ordo vester exemptionis privilegio gaudeatis, & an juris, & proprietatis Beati Petri, ac etiam a cujusvis alterius jurisdictione prorsus exempti; & tam in spiritualibus, quàm in temporalibus, quorum vobis usum habere licet, immediate subjecti Sedi Apostolicæ existatis; quantumcumque vobis, & eidem Ordini per diversos prædecessores nostros Romanos Pontificès super his plene, sicut asseritis, sit provisumb: Nos vestræ, & ejusdem Ordinis providere quieti, paternæ solicitudinis studio intendentes; sicque volentes super hoc omnem dubitationis, ambiguitatis, & querelæ materiam funditus amputare; ne quis vos, & eumdem Ordinem super exemptione hujusmodi, ac aliis vestris, & ipsius Ordinis libertatibus, & immunitatibus quibuscumque vobis, & ei ab Apostolica Sede concessis, impugnare valeat, vel quomodolibet molestare: Vos, & ordinem ipsum a cujusvis alterius jurisdictione omnimoda prorsus eximimus de gratia speciali, decernentes, vos, & eumdem Ordinem immediate Sedi subjacere prædictæ, Ecclesias verò, & Oratoria, Domos, loca, libros, utensilia, & alia mobilia, & immobilia, quorum usum habetis ex licito, cum cæteris quocumque modo pertinentibus ad prædicta, & aliquod prædictorum, in jus, & proprietatem Beati Petri apostolica auctoritate suscipimus; illis ex eis dumtaxat exceptis, in quibus expressè donatores, seu translatores sibi proprietatem, & dominium constiterit reservasse. Præterea Ecclesias, Oratoria, Domos, & loca prædicta, quæ tenetis, & inhabitatis, & tenebitis, & inhabitabitis in futurum, dum & quoties vos illa tenere, & inhabitare contigerit, esse omnino exempta, decernimus, nulloque medio Sedi memoratæ subesse. Nulli ergo omnino hominum liceat hanc paginam nostræ exemptionis infringere, vel ei ausu temerario contraire. Datum ut supra.
-
Bullarium Franciscanum romanorum pontificum, tomus IV, n°XIX., pp.-18
-
(a) Generali: Matthæo Aquaspartano, ut supra.
-
(b) Sit provisum: ut legere est præcedentia diplomata in superioribus tomis hujus Bullarii vulgata.