Général
-
Nicolas IV (1288-1292)
-
Nonnulla se mittere, scribit pro ornamentis, atque indigentiis Assisiatis Ecclesiæ S. P. Francisci. ex autographo in Archivo Assis. Conventus S. Francisci publicato ab Autore Operis inscripti Collis Paradisi lib. 2. pag. 38.
-
Anno 1288. die 24. vel 25. Feb.
-
1288
-
NICOLAUS &c.
Dilecto Filio Custodia FF. Ord. Min. Ecclesiæ S. Francisci in Assisio Sal., & Ap. Ben.
Suscepimus nuperb, licèt immeriti, supernæ dispositionis arbitrio, prout jam famæ præambulæ te credimus didicisse relatibus, curam, & regimen Ecclesiæ generalis, gravis oneris sarcinam, quam exequutio Pastoralis officii secum trahit, sub humilitatis spiritu subeuntes. Porro longis retro temporibus Ordinis Fratrum Minorum funiculisc salubriter alligati ad Venerabilem Ecclesiam Beati Francisci de Assisio grandem, & continuum gessimus dilectionis affectum, statum ejus quietum, & prosperum ad Dei laudem, & gloriam votis ferventibus cupientes. In signum igitur dilectionis hujusmodi, & evidens specialis reverentiæ argumentum, quam ad præfatam Ecclesiam, & eumdem Beatissimum Confessorem habuimus, & habemus, ac etiam habere proponimus in futurum, nonnulla diversi coloris paramenta:d, pontificaliae serica, vasa argentea, certam summam pecuniæ, ac quædam alia in cedulaf præsentibus interclusa distincte, plane, ac seriatim expressa, quæ ante nostræ promotionis auspicia facultates nostræ paupertatis habebant; eidem Ecclesiæ donamus, atque concedimus de gratia speciali; eaque ipsi Ecclesiæ per dilectum filium Magistrum Petrum de Sora Clericum, & familiarem nostrum latorem præsentium mittimus, per eum tibi Ecclesiæ prædictæ nomine fideliter assignanda. Datum Laterani. VI. Kalendas Martiig Pontificatus nostri anno primoh.
-
Bullarium Franciscanum romanorum pontificum, tomus IV, n°II., pp.4-5
-
(a) Custodi: sive Præfecto, al: Guardiano Cœnobii, ut aliàs monuimus.
-
(b) Nuper: nempe biduum ante, sive viii. Kalendas Martii, ut initio notatum legitur.
-
(c) Fratrum Minorum funiculis: a juventute sua, ut ipsemet fatetur in superiori epistola.
-
(d) Paramenta: nempe vestes sacras pro Missarum, ac Officiorum sacrorum solemni celebratione.
-
(e) Pontificalia: quibus uti debent Episcopi in prædictis ministeriis Eccles.
-
(f) Cedula: vulgò pro Scheda, vel Schedula latine.
-
(g) Vi. Kalendas Martii: quo confirmantur quæ diximus in epistola præcedenti contra illos, qui tradunt, Nicolaum die 24. al. 25. Martii coronatum fuisse: porro hoc anno 1288., cum intercalaris esset, bis sexto Kalendas dicebatur diebus 24. & 25. Februarii.
-
(h) Insequenti anno eidem Ecclesiæ Auriphrygium pretiosum dono misit ex epistola, Excitamur ab intimis &c. eo anno die 7. Augusti scripta: & in Indice vulgò Repertorio, ac Inventario rerum illius sacri Conventus anno 1370. conscripto, vel recognito pag. 21. legitur: In primis unus magnus Calix de argento inauratus cum smaltis, & figuris, quem misit Dominus Nicolaus Papa de Ordine Minorum: & in signum hujus dictus Papa est ibi figuratus, & nomen suum descriptum: & est ponderis XLV. unciarum.