« bullarium-franciscanum-2396 »

HONORIUS &c.

Dilectis Filiis … Archidiacono, & … Priori Prædicatorum, & … Guardiano Fratrum Minorum Ordinum Pergamen.a Salutem, & Apostolicam Benedictionem.

Exhibita Nobis dilecti Filii Nobilis Viri Theobaldi de Cataneis de Muco, & dilectæ in Christo Filiæ Nobilis Mulieris Gillæ natæ dilecti Filii Nobilis Viri Armanni de Bongiisb de Pergamo petitio continebat; quòd olim ad sedandas graves inimicitias inter consanguineos & amicos eorum, procurante pacis æmulo suscitatas, ex quibus plura animarum pericula, totique Civitati Pergamenæ dura discrimina incumbebant; ignorantes, quòd aliqua esset affinitas inter eos, publicè in faciem Ecclesiæ, prout in partibus illis moris esse dignoscitur, matrimonium invicem contraxerunt, nemine contradicente, vel impedimentum aliquod proponente; ac postmodum inter eos carnali copulâ subsecutâ, filium procrearunt: Et tandem compertum extitit, quòd quondam Stezana præfati Teobaldi uxor eidem Gillæ erat, dum viveret, tertio consanginitatis gradu conjuncta. Quare dicti Theobaldus & Gilla habentes exinde conscientias remordentes super hoc Apostolicæ Sedis misericordiam implorarunt. Et asserentes, quòd ex hujusmodi matrimonii separatione, si fieret, graviores inimicitias suscitari, & majora evenire pericula inter ipsos, & consanguineos, & amicos eosdem, magnumque in partibus illis scandalum contigeret generari; Nobis humiliter supplicarunt, ut hujusmodi periculis occurrentes, cum eis, quòd, impedimento hujusmodi non obstante, in matrimonio remanere licitè valeant, dispensare misericorditer dignaremur. Nos autem, qui salutem quærimus singulorum; & libenter Christifidelibus quietis commoda procuramus; volentes evitare pericula supradicta, quia vos de facto, & facti circumstantiis habere poteritis notitiam pleniorem; prævia vobis auctoritate committimus, ut, si præmissis veritas suffragatur; & præfati Theobaldus & Gilla tactis Sacrosanctis Evangeliis præstito firmaverint juramento, quòd contracti matrimonii prædicti tempore, impedimentum hujusmodi ignorabant; & timeatur de periculis, quæ narrantur, super quibus vestram intendimus conscientiam onerare; cum Theobaldo & Gilla prædictis, quòd, eodem impedimento nequaquam obstante, in sic contracto matrimonio remanere licitè valeant; auctoritate Nostrâ dispensare curetis; prout secundum Deum videritis expedire; Prolem susceptam, & suscipiendam ex eis legitimam nunciando. Non obstante Indulgentiâ, si qua vobis, Filii Prior, & Guardiane, vel Ordinibus vestris a Sede Apostolicâ sit concessa, quòd non teneamini vos intromittere de quibuscumque negotiis, quæ vobis per litteras a Sede committuntur eâdem, nisi de indulto hujusmodi plena, & expressa mentio habeatur. Quòd si non omnes iis exequendis interesse potueritis, duo vestrum ea nihilominus exequantur.

Datum Romæ apud Sanctam Sabinam ii. Nonas Februarii, Pontificatus Nostri Anno Secundo.