« bullarium-franciscanum-2317 »

MARTINUS &c.

Dilecto Filio .... Guardiano Fratrum Minorum Civitatis Castellia Sal., & Apost. Benedictionem.

Ex parte … Potestatis, … Capitanei, Consilii, Officialium, & Communis Civitatis Castellib fuit Nobis humiliter supplicatum; ut cum ipsi super excommunicationis, & interdicti sententiis, ac pecuniariis pœnis, quas incurrisse noscuntur, ex eo quòd dudum Ballionumc Militem Perusinumd tunc rebellem Ecclesiæ contra mandatum Nostrum sub certâ formâ, & pœnâ per specialem Nuntium & litteras eis factum pro Potestatee retineri temerè præsumpserunt; & aliàs contra Fulginates Perusinisf tunc in rebellione prædictæ Ecclesiæ persistentibus dederunt auxilium, consilium, & favorem; nec non super quibuscumque aliis excessibus, quos reperirentur contra Nos, & Romanam Ecclesiam commisisse; per proprium eorum Syndicum ad hoc specialiter constitutum juraverunt Nostris, & ipsius Ecclesiæ precisè stare mandatis; & nonnullas de satisfaciendo præstiterint cautiones; eos absolvi a præfatis excommunicationibus, & relaxari interdictum hujusmodi per discretum aliquem misericorditer faceremus. Nos igitur, licèt ex causis prædictis possemus contra eos rigorem juris duriùs exercere, consideratâ tamen devotionis constantiâ, qua erga prædictam Ecclesiam viguerunt temporibus retroactis, speramus, quòd quantò benigniùs se a Nobis tractari perceperint, tantò ferventiùs in ejusdem Ecclesiæ devotione consurgent; volumus, & Discretioni tuæ præsentium auctoritate mandamus, quatenus præfatis .... Potestati, … Capitaneo, Consiliariis, Officialibus, & singularibus personis Civitatis, & Diœcesis Castellanæ, cum ab eis fueris requisitus, auctoritate Nostrâ juxta formam Ecclesiæ beneficium absolutionis impendas, & relaxes hujusmodi interdictum: Mandans eis ex parte Nostrâ, quòd infra Kalendas Maij proximò futuras de dictis pœnis pecuniariis, quas incurrisse noscuntur, sic Nobis, & Ecclesiæ satisfacere studeant, quòd Nos de ipsorum satisfactione contentos non immeritò reputemus. Alioquin prædicas eisdem, quòd si hoc facere non curarent, ex tunc prædictos .... Potestatem, .... Capitaneum, Consiliarios, Officiales, & alias singulares personas, excommunicationis sententiæ, quam ex nunc in ipsos proferimus, & prædictam Civitatem interdicto Ecclesiastico, cui ex nunc similiter ipsam subjicimus, volumus subjacere ita videlicet, quòd ex tunc, si secus fecerint, iidem … Potestas Capitaneus, & Consiliarii, Officiales, & singulares personæ in excommunicationis, & Civitas eadem in interdicti sententias relabantur. Tu quoque tuæ diligentiæ studium in hac parte prudenter exercens de absolutione, relaxatione, mandato, & prædicatione hujusmodi, ac de aliis omnibus, quæ feceris in præmissis, confici facias publica instrumenta, illa Nobis per fidelem Nuntium transmissurus. Non obstante indulgentiâ &c.g

Datum Perusii iv. Kalendas Februarii, Pontificatus Nostri Anno Quarto.