« bullarium-franciscanum-2313 »

MARTINUS &c.

Dilecto Filio Fratri Monaldoa Ordinis Fratrum Minorum Inquisitori Hæreticæ pravitatis in administratione Beati Franciscib a Sede Apostolica deputato Sal., & Apostolicam Benedictionem.

Ex parte … Potestatis, Consilii, Officialium, ac Hominum Civitatis, & Diœcesis Narnien.c fuit Nobis expositum, ut cum ipsi super excommunicationis, & interdicti sententiis, ac certis pœnis pecuniariis, quas pro eo quòd contra mandatum Apostolicum sub certâ formâ per speciales & diversas Nostras litteras eis factum, & alias etiam Hominibus Perusinis, & eorum sequacibus tunc in rebellione Sedis Apostolicæ persistentibus contra Homines de Fulgineod dederunt auxilium, consilium, & favorem, incurrisse noscuntur; per … Syndicum eorum legitimum ad hoc specialiter constitutum præcisè stare juraverunt Nostris beneplacitis & mandatis; sicque per eos de hujusmodi pœnis juxta Nostrum beneplacitum Nostræ Cameræ satisfactum, ipsos a dictâ excommunicatione absolvi, & interdictum hujusmodi relaxari per discretum aliquem misericorditer mandaremus. Nos itaque more pii Patris volentes benigniùs agere cum eisdem, ac satisfactionem hujusmodi acceptantes, eos a præfatis pœnis pecuniariis præsentium auctoritate absolvimus, & quitamuse, tibi, de cujus circumspectione confidimus, per Apostolica scripta mandantes, quatenus auctoritate Nostrâ præfatum interdictum relaxans, eisdem … Potestati, Consiliariis, Officialibus & Hominibus dictæ Civitatis, & Diœcesis Narnien. cum ab ipsis requisitus fueris per te, vel alium, seu alios a præfatâ excommunicationis sententiâ beneficium absolutionis impendas juxta formam Ecclesiæ consuetam, & injungas eis pœnitentiam salutarem. Nos autem non intendimus per quitationem, absolutionem, & relaxationem hujusmodi eisdem hominibus de Fulgineo aliquod præjudicium generari, quominus super damnis illatis eisdem prædicti Narnienses, & homines ejusdem Diœcesis teneantur plenariè stare juri.

Datum Perusii xii. Kalendas Januarii, Pontificatus Nostri Anno Quarto.