« bullarium-franciscanum-2301 »

MARTINUS &c.

Venerabili Fratri B.a Episcopo Portuensi Apostolicæ Sedis Legato Salutem, & Apostolicam Bened.

Intimante Nobis tuâ prudentiâ circumspectâ didicimus, quòd Prædicatorum, & Minorum Ordinum Fratres, & quidam alii Religiosi Civitatis Urbinib privilegia Sedis Apostolicæ asserunt se habere, ut certis festivitatibus possint Divina Officia publicè celebrare tempore Interdicti. At ipsi non solum in eisdem festivitatibus, verùm etiam per decem dies post quamlibet festivitatum ipsarum publicè hujusmodi celebrare Officia non verentur; nec dubitantes in fraudem agere Interdicti, quamplura in Ecclesiarum portis foramina faciunt, ut Populus etiam clausis januis possit interiùs Sacra prospicere, ac liberiùs audire Divina: Super quibus petiisti per Sedem Apostolicam provideri. Nos itaque non indignè volentes, ut iidem Prædicatores, & Minores, ac alii Religiosi puniantur in eo, in quo delinquere dinoscuntur; præfatis Prædicatoribus, & Minoribus, ac Religiosis aliis memoratis prædictorum privilegiorum usum quoad Civitatem eamdem & ejus districtum, quamdiù in rebellione permanserint, auctoritate præsentium expressè interdicimus, Tibi districtiùs injungentes, ut illarum Ecclesiarum, in quarum portis foramina ipsa fuerint, si ad ea iidem operam dederint, auctoritate Nostrâ Ecclesiastico subjicias Interdicto contra foraminum ipsorum auctores aliàs nihilominus processurus, prout qualitas facti exegerit, & videris expedire.

Datum apud Urbemveterem iv. Nonas Decembris, Pontificatus Nostri Anno Tertio.