« bullarium-franciscanum-2190 »

NICOLAUS &c.

Dilectis Filiis L.a Electo Consanob , & …c Ministro Provinciali Fratrum Minorum Provinciæ Siciliæ Salutem, & Apostolicam Benedictionem.

Lecta nobis dilecti Filii Nicolai Civis Castellaneten.d dicti Magistri petitio continebat, quòd ipse dignum ducens, & salubre non immeritò reputans dare aliqua de bonis suis illi, qui sibi contulit universa, & terrena pro cœlestibus; ac momentanea pro æternis felici commercio commutare; Ecclesiam Sancti Matthæi sitam in fundo, seu tenimento Civitatis ejusdem Castellaneten. Diœcesis Monasterio Caven.e, quod ad nos & Romanam Ecclesiam immediatè pertinet, Ordinis Sancti Benedicti Salernitanæ Diœcesis in spiritualibus, & temporalibus pleno jure subjectam, ac olim totaliter dirutam, & destructam sumptibus propriis reædificavit, sive reparavit honorificè; ac ad statum honestatis & cultus Divini reduxit, pietatis intuitu de Consensu Abbatis, & Conventus Monasterii memorati ferventer cupiens, illam in Monasterium præfati Ordinis erigi, quod proponit firmiter de terris, possessionibus, & aliis bonis suis adeo dotare decenter, quòd Abbas præficiendus ibidem, sive de ipsius, sive de dicti Monasterii Caven. gremio tantummodo, & non aliunde imposterum eligendus, nec non competens Monachorum, ac Fratrum sub Regulari observantiâ præfati Ordinis ibidem Domino famulantium numerus possint exinde congruè sustentari. Ita tamen, quòd hujusmodi Monasterium de novo in dictâ Sancti Matthæi Ecclesiâ erigendum præfato Caven. Monasterio, sicut subjecta est sibi præfata Ecclesia, totaliter sit subjectum. Abbas verò & Conventus ipsius Monasterii Caven., qui pro tempore fuerit, electionem Abbatis, quem in hujusmodi novo Monasterio Sancti Matthæi juxta præmissum modum canonicè contigerit eligi, examinent & confirment, si fuerit confirmanda. Electio quidem hujusmodi ad Monachos ipsos ejusdem Monasterii novi pertineat; ac Abbas prædicti Monasterii Caven., qui erit pro tempore, dictum Monasterium Sancti Matthæi oportunis temporibus visitet; ac in eo corrigat, & reformet, quæ correctionis & reformationis officio viderit indigere; Episcopus autem Castellaneten., qui erit pro tempore, Abbatem, qui sic inibi eligetur, postquam per eosdem Abbatem & Conventum Caven. legitimè fuerit confirmata, benedicere habeat; si tamen benedictionem hujusmodi liberaliter, & sine pravitate aliquâ voluerit exhibere; antiquo censu, quem præfatus Episcopus in supradicta Ecclesiâ Sancti Matthæi consuevit percipere, sibi plenariè reservato. Quare supradictus Civis humiliter postulari fecit a Nobis, ut complemento hujusmodi sui pii desiderii benignum assensum dignaremur favorabiliter impertiri. Verùm quia Nobis non constitit de præmissis; Nos de vestrâ circumspectione confisi Discretioni vestræ per Apostolica scripta mandamus, quatenus vocatis, qui fuerint evocandi; si tam prædicti Episcopi, quàm eorumdem Abbatis & Conventus Caven., quàm etiam omnium aliorum, quibus posset exinde præjudicium generari, ad universa singulaque præmissa spontaneus accedat assensus; & aliquod canonicum non obsistat super præmissis, super quibus vestram intendimus conscientiam onerare, auctoritate Nostra providere curetis; prout secundum Deum ad Divini cultus augmentum sine alieni tamen juris præjudicio videritis expediref.

Datum Romæ apud Sanctum Petrum x. Kalendas Maii, Pontificatus Nostri Anno Secundo.