Général
-
Nicolas III (1277-1280)
-
Super quodam matrimonio illicite contracto, attentis nonnullis circumstantiis, dispensare valeant. (Ex Vatic. Reges. Pontif. epist. 83. anni 1.)
-
Anno 1278. die 1. Julii.
-
1278
-
NICOLAUS &c.
Venerabili Fratri ....a Archiepiscopo Auxitanob , & dilectis Filiis … Priori Prædicatorum de Morlanisc , & … Guardiano Nugarolensid Minorum FF. Ordinum Lascurren.e , & Auxitanæ Diœcesum Sal., & Apost. Ben.
Sua Nobis dilectus Filius Fortius de Salis Laicus Auxitanæ Diœcesis petitione monstravit, quòd licet ipse cum quadam puellâ infra annos nubiles constitutâ sponsalia contraxisset; tamen postmodum eâ, antequam ad hujusmodi annos nubiles pervenisset, viam universæ carnis ingressâ, Julianam sororem ipsius Puellæ dictorum sponsaliorum prorsus ignaram sibi publicè in Ecclesiæ facie matrimonialiter copulavit; & sibi cohabitans ut uxori multiplicem prolem substulit ex eadem. Quare dictus Laicus Nobis humiliter supplicavit, ut cum ex ipsius, & ejusdem Julianæ separatione grave posset in illis partibus scandalum generari, cum ipso & eâdem Julianâ, quòd non obstante publicæ honestatisf justitiâ, possit in contracto inter se matrimonio licitè remanere, dispensare de benignitate Sedis Apostolicæ curaremus. Nos itaque de Discretione vestrâ plenam in Domino fiduciam obtinentes Discretioni vestræ per Apostolica scripta mandamus, quatenus, si priora sponsalia sic fuerint notoria, vel manifesta, quòd ex sequenti matrimonio cum sorore prædictâ scandalum in populo sit secutum, cum eis minime dispensetis; nisi ex separatione matrimonii grave scandalum, vel graves inimicitiæ sequerentur: Si autem scandalum non est ex sequenti matrimonio subsecutum; vel si etiam secutum fuisset, ex separatione tamen grave scandalum, vel grave odium timeretur; cum ipsis, quòd impedimento hujusmodi non obstante in eodem matrimonio licitè remanere valeant, auctoritate Nostrâ dispensare curetis, prout secundùm Deum videbitis expedire.
Datum Viterbii Kalendis Julii, Pontificatus Nostri Anno Primo.
-
Bullarium Franciscanum romanorum pontificum, tomus III, n°XXXVII., p.320
-
(a) Ven. Fratri …: Grimerio an. 1272. Idibus Januarii assumpto per translationem Vicedomini O. M. B. Gregorii PP. X. nepotis ad Prænestinam Ecclesiam, ex Gallia Christiana to. 1. de Eccl. Aquensi col. 317.
-
(b) Auxitano: De qua Metropoli diximus etiam in 1. hujus Operis tomo pag. 647. (a)
-
(c) Morlanis: Ut in cit. 1. tomo pag. 294. (g)
-
(d) Nugarolen.: Conventus O. M. quartus Custodiæ Auxitanæ in Provincia Aquitaniæ ex veteri al. cit. Provinciali Ord. nostri apud Pisanum Conform. xi. tertius vero apud Chronicon Jordani Ms. Vatic., cujus mentionem facit Waddingus ad ann. 1277. num. 22., in testamento etiam Isabellæ de Lebreto Comitissæ Arminiaci anno 1294. condito, & in to. 4. Veter. Script. Martene, Durandique relato col. 1390. legitur n. 6. Item Fratribus Minoribus Nugaroli ducentos solidos Morlanenses.
-
(e) Lascuren.: Episc. Aquitaniæ sub Archiepiscopo Auxitano.
-
(f) Publicæ honestatis: Ex sponsalibus enim validis oritur inter consanguineos sponsæ, & sponsum impedimentum publicæ honestatis usque ad primum dumtaxat gradum ex Conc. Trident. sess. 24. cap. 3.