Général
-
Clément IV (1265-1268)
-
Si expediens agnoverit, cessionem Abbatissæ Monasterii S. Catharinæ Genuen. ab officio recipiat, & aliam ejusdem Monasterii Præfectam eligi committat. (Ex Reges. Vatic. epist. 155. to. 3. anno I.)
-
Anno 1265. die 15. Octobris.
-
1265
-
CLEMENS &c.
Venerabili Fratria … Archiepiscopo Januen. Sal., & Apost. Bened.
Propter proprii debilitatem corporis, qua dilecta in Christo Filia Agnesb Abbatissa Monasterii Sanctæ Caterinæc Ordinis Sanctæ Claræ Soror Venerabilis Fratris nostrid … Patriarchæ Antiochen. plurimum aggravari, ac etiam alias ob incommoditates multiplices, quas eadem inibi sustinere proponitur, in commisso sibi Monasterii prædicti regimine, se nequit utiliter, prout esset expediens, exercere. Hoc sane Abbatissa eadem considerans hac de causa eximi ab ipsius Monasterii sollicitudinis cura, & in contemplativo quietis otio desiderat collocari, supplici a Nobis deposcens instantia, ut cessionem ipsius recipi; sibique transferendi se ad Monasterium de Clavaroe prædicti Ordinisf Januen. Diœcesis, ubi sub habitu regulari disponit, ut asserit, devotum Domino perpetuo impendere famulatum, concedi licentiam de benignitate solita faceremus. Volentes igitur sic Abbatissæ prædictæ votis in hac parte annuere, quod per hoc præfato Sanctæ Caterinæ Monasterio nullum damnum, vel præjudicium debeat imminere; Fraternitati tuæ, de qua plenam in Domino fiduciam obtinemus, per Apostolica scripta mandamus, quatenus consideratis diligenter circumstantiis universis, quæ circa hoc fuerint attendendæ; si hoc tam Abbatissæ, quam Monasterio Sanctæ Caterinæ prædictis videris expedire; ab eadem Abbatissa præfati regiminis auctoritate nostra cessionem recipias; sibique nihilominus licentiam tribuas postulatam. Demum autem Conventui prædicti Monasterii Sanctæ Caterinæ injungas, ut sibi de persona idonea in Abbatissam per electionem canonicam studeat providere. Contradictores per censuram Ecclesiasticam appellatione postposita compescendo.
Datum Perusii Idibus Octobris, Pontificatus Nostri Anno Primo.
-
Bullarium Franciscanum romanorum pontificum, tomus III, n°XLVIII., p.45
-
(a) Ven. fratri: Valtero de Vezzano, de quo Ughellus tom. 4. Ital. Sac., & nos non semel egimus in not. ad alias epistolas.
-
(b) Agnes: De qua mox infra.
-
(c) Monasterii S. Catharinæ: De Loculo al. de Loculis Genuen. nuncupati, cujus pluries a nobis actum, & ultimo sub ann. 1260. die 8. Febr. ad Alexandri IV. diploma Justis petentium &c.
-
(d) Fratris nostri ‥: Christiani ex Ord. Prædicat., de quo in epist. 135. Urbani IV. Tuæ pacis &c. anno 1264. die 31. Martii data; hinc videtur patria Genuensis.
-
(e) Monasterium de Clavaro: Pro quo consulendum Alexandri IV. privilegium Religiosam vitam &c. anno 1258. die 31. Julii al. 12. Aug. editum sub num. cdxxxvii. in 2. hujus Operis tomo fol. 303.
-
(f) Prædicti Ordinis: Nimirum S. Claræ.